Senattyń jalpy otyrysynda QR Ortalyq sailaý komissiiasy múshesi Serik Sydyqovtyń ókilettigi toqtatylyp, qyzmetinen bosatyldy, dep habarlaidy QazAqparat.
«Senat taǵaiyndaǵan QR Ortalyq sailaý komissiiasy múshesiniń ókilettigin toqtatý jáne qyzmetinen bosatý týraly másele qaralady. Serik Slamjanuly Sydyqovtyń atynan Ortalyq sailaý komissiiasy múshesinen bosatý týraly ótinish kelip tústi. Reglament boiynsha biýronyń sheshimimen bul máseleni Senattyń Konstitýtsiialyq zańnama, sot júiesi jáne quqyq qorǵaý organdary komiteti aldyn ala talqylap, óz qorytyndysyn ázirledi», - dedi Senat tóraǵasy Máýlen Áshimbaev.
Osy oraida sheshim ashyq daýys berý arqyly qabyldanyp, palata depýtattary bul sheshimge qoldaý bildirdi.
Serik Sydyqov 1962 jyly týǵan. Kirov atyndaǵy Qazaq memlekettik ýniversitetin bitirgen. Eńbek jolyn 1 985 jyly Almaty qalasynda «Kazgidrorybproekt» institýty kadr bóliminiń aǵa inspektory retinde bastaǵan.
Qazaqstan Respýblikasy Parlamentinde 1995 jyldan beri jumys istegen. Senat Apparaty Quqyqtyq saraptama bóliminiń konsýltanty, sektor meńgerýshisi, Saraptama bólimi meńgerýshisiniń orynbasary, Ákimshilik bóliminiń meńgerýshisi, Senat Apparaty basshysynyń orynbasary bolyp qyzmet atqarǵan.
Eske sala keteiik, ol QR Ortalyq sailaý komissiiasynyń múshesi qyzmetine 2020 jyly sáýirde bekitilgen edi.
