«Ońtústik» aimaǵynan (Shymkent, Jambyl, Qyzylorda jáne Túrkistan oblystary) 38 shahmatshy «Senat Open» II Ashyq kýbogynyń finalyna joldama aldy.
2025 jylǵy 25 maýsymda Túrkistan qalasynda týrnirdiń bes jartylai finalynyń alǵashqysy aiaqtaldy. Jarysqa 129 úzdik oiynshy qatysty: Shymkentten – 29, Jambyl oblysynan – 32, Qyzylorda oblysynan – 34 jáne Túrkistan oblysynan – 34 qatysýshy. Týrnir jeńimpazy – Qyzylorda oblysynan 68 jastaǵy Iýrii Egai boldy. Ol jalpy 9 upaidyń 8-in jinady. Ekinshi oryndy 7,5 upaimen Túrkistan oblysynan 41 jastaǵy Serik Qydyrbaev ielendi. Úshinshi oryndy 7,5 upaimen Qyzylorda oblysynan 75 jastaǵy Barat Jetpisbaev aldy. Qydyrbaev Býhgolts koeffitsienti boiynsha Jetpisbaevtan ozyp ketti. Taǵy jeti oiynshy 7 upaidan jinady.
Týrnir saltanatty ashylý rásiminen bastaldy. Túrkistan oblystyq máslihatynyń tóraǵasy Nuraly Ábishov pen Qyzylorda oblystyq máslihatynyń tóraǵasy Murat Tleýmbetov shahmat sportynyń damýyna qosqan úlesi úshin KazChess uiymynyń «II dárejeli úzdik belgisimen» marapattaldy. Osydan keiin oiyn bastaldy.
Tórtinshi týrdan keiin alty oiynshynyń esebinde tórt jeńisten boldy. Besinshi týrda kósh basynda eki oiynshy qaldy: Túrkistan oblysynan Serik Qydyrbaev pen Shymkentten Asylbek Túietaev. Altynshy týrda Qyzylorda oblysynan Edýard Pak pen Iýrii Egai olarǵa teńesti. Jetinshi týrdan keiin Egai men Qydyrbaev 6,5 upaimen alǵa shyqty. Olardy 6 upaimen Tlektes Taiqara, Barat Jetpisbaev jáne Sapar Tájidinov qýyp jetip kele jatty. Sońǵy týrda Egai Jetpisbaevpen teń oinap, kóshbasshylyqty saqtap qaldy. Qydyrbaev Jambyl oblysynan Jánibek Qoǵabaevty jeńdi. Taiǵara men Túietaev ózara teń tústi.
Jeke birinshilikpen qatar, kelesi alty nominatsiia boiynsha marapattar tabystaldy:
• Ardagerler: Iýrii Egai, Qyzylorda oblysy, 1-shi oryn;
• Áielder: Gúlzaia Qurmanbaeva, Qyzylorda oblysy, 81-shi oryn;
• Depýtattar men máslihat qyzmetkerleri: Júnisbek Serikov, Jambyl oblysy, 29-shy oryn;
• Memlekettik qyzmetshiler: Sapar Tájidinov, Shymkent, 6-shy oryn;
• Qoǵamdyq keńes músheleri: Serik Qydyrbaev, Túrkistan oblysy, 5-shi oryn;
• BAQ ókilderi: Asylbek Túietaev, Shymkent, 4-shi oryn.
«Ońtústik» aimaǵynan finalǵa 38 shahmatshy joldama aldy: Túrkistan oblysynan – 13, Shymkentten – 10, Jambyl oblysynan – 8, Qyzylorda oblysynan – 7.
«Senat Open» týrniri alǵash ret ótken jyly uiymdastyrylyp, 2000-nan astam shahmat áýesqoiyn jinaǵan bolatyn. Bul týrnir ideiasynyń avtory – Qazaqstan Respýblikasy Parlamenti Senatynyń tóraǵasy Máýlen Áshimbaev, al ony Qazaqstan shahmat federatsiiasynyń prezidenti Timýr Týrlov qoldady.
2025 jyly týrnir ekinshi ret ótýde. Júie ózgergen joq: 20 irikteý kezeńi – 21 aqpannan 27 mamyrǵa deiin, 5 jartylai final – 25 maýsym men 9 tamyz aralyǵynda.
Final – 29 tamyz kúni Astana qalasynda ótedi.
«Senat Open» týrnirine 2025 jylǵy 1 qańtardaǵy reitingi 2000-nan tómen shahmatshylar ǵana qatysa alady. Jarys shveitsar júiesi boiynsha 9 týrdan turady, ýaqytty baqylaý 10 minýt + ár júriske 5 sekýnd formatynda ótedi.
Irikteý týrlaryna 2100-den astam adam qatysqan. Ardagerler arasyndaǵy jarystardy qosa eseptegende, qatysýshylardyń jalpy sany 3000 adamnan asty.
Túrkistanda ótken «Senat Open» týrniriniń alǵashqy jartylai finaly básekelestiktiń joǵary deńgeiin kórsetti. Bul týrnir Qazaqstandaǵy shahmattyń tanymaldyǵyn arttyryp, myńdaǵan áýesqoilardy biriktirip otyr.
