Senat depýtaty Beibit Isabaev Májiliske keri qaitarylǵan balalardy kiberbýllingten qorǵaý týraly zańǵa qandai túzetý engizý qajettigin aityp berdi, dep habarlaidy QazAqparat.
«Zań jobasyn talqylaǵan soń Senat Májilis maquldaǵan zań jobasynyń keibir normalarymen kelisken joq. Senat oǵan birqatar túzetý engizip, Májiliske keri qaitardy. Birinshisi – senatorlar ýákiletti organnyń – Aqparat jáne qoǵamdyq damý ministrliginiń quqyqqa qaishy kontentti ornalastyratyn internet-resýrstardyń biryńǵai tizilimin júrgizý ókilettikterin alyp tastaýdy usynady. «Quqyqqa qaishy kontent» uǵymynyń aýqymy jeke tulǵaǵa jala jabýdan bastap, bilikti kúshpen basyp alýǵa jáne terroristik aktilerge shaqyrýǵa deiin aitarlyqtai keń», - dedi Beibit Isabaev Senattyń jalpy otyrysynan keiin tilshilerge bergen suhbatynda.
Ekinshi túzetý – Senat óziniń zańǵa táýeldi aktisimen ýákiletti organnyń quqyqqa qarsy kontentti jariialaýǵa jol bergen internet-resýrstarǵa qoljetimdikti shekteý qaǵidalaryn belgileý ókilettigin alyp tastaýdy usynady, óitkeni bul máselelerdiń barlyǵy Bailanys týraly zańnyń 41-1 baby arqyly rettelgen.
«Sondyqtan senatorlar Bailanys týraly zańnyń qoldanystaǵy normalaryn jańa zańda qaitalaýdyń qajeti joq dep sanaidy. Úshinshiden, ata-analardyń nemese QR azamattarynyń balalarǵa qatysty kiberbýlling faktileri boiynsha ótinishterin jeke sheneýnik nemese qurylymdyq bólimsheniń basshysy emes, quramyna tek ýákiletti organnyń qyzmetkerleri jáne túrli salanyń mamandary, onyń ishinde psihologtar, lingvister, zańgerler jáne basqalary kirýi tiis arnaiy qurylǵan saraptama toby qaraýy úshin túzetýler usynylady», - dedi depýtat. Tórtinshi túzetý – Májilis maquldaǵan zań jobasynda QR zańnamasyna qaishy keletin barlyq kontentti joiý qarastyrylǵan, al bizdiń nusqada – balalarǵa qatysty kiberbýllingtiń aiqyn belgileri bar, sarapshylar keńesi balalarǵa qatysty kiberbýlling dep tanyǵan kontentti ǵana alyp tastaý usynylady. Bul rette kiberbýlling kontentin internet-resýrstyń resmi ókili bir táýlik ishinde óshirýi tiis», - dep túiindedi senator.
Atalǵan túzetýler Májiliske jiberildi jáne Májilis kelisken jaǵdaida zań birden Memleket basshysynyń qaraýyna jiberiledi.
Eske sala ketsek, búgin Senattyń jalpy otyrysynda «Qazaqstan Respýblikasynyń keibir zańnamalyq aktilerine balanyń quqyqtaryn qorǵaý, bilim berý, aqparat jáne aqparattandyrý máseleleri boiynsha ózgerister men tolyqtyrýlar engizý týraly» zań jobasy eki oqylymda qaraldy.
