QR Parlamenti Senaty «Qazaqstan Respýblikasyndaǵy Adam quqyqtary jónindegi ýákil týraly» zań jobasyna túzetýler engizip, Májiliske qaitardy, dep habarlaidy QazAqparat tilshisi.
«Ýákil zań jobasynda táýelsiz jáne eshbir memlekettik organ men laýazymdy tulǵalarǵa esep bermeitin jaýapty memlekettik laýazymdy ielenetin tulǵa retinde aiqyndalady. Adam quqyqtary jónindegi ýákilge onyń qylmystyq jaýaptylyǵyna nemese ákimshilik jaýapkershiligine qol suǵylmaýshylyq mártebesi beriledi jáne kýágerlik aiǵaqtar berýden bosatylady. Ombýdsmenniń zańdy qyzmetine aralasýǵa ne kedergi keltirýge tyiym salynady. Adam quqyqtary jónindegi ýákilge kelsek, onyń qyzmetine qatysty kelesi ózindik talaptar men shekteýler kózdeledi: saiasi qyzmetpen ainalysýǵa, memlekettik qyzmette bolýǵa, saiasi partiialarǵa qatysýǵa tyiym salý jáne taǵy da basqa», - dedi joǵarǵy palatanyń jalpy otyrysynda Senat Tóraǵasynyń orynbasary Asqar Shákirov.
Onyń atap ótýinshe, ombýdsmenniń ókilettikteri aitarlyqtai keńeiedi.
«Ýákil mynadai quqyqtarǵa ie: Prezidentke, Parlament pen Úkimetke adam men azamattyń quqyqtary men bostandyqtaryn kótermeleý jáne qorǵaý máseleleri boiynsha Qazaqstan Respýblikasynyń zań jobalaryn ázirleý, zańnamasyn jetildirý jóninde usynystar engizý; shaqyrylǵan jaǵdaida Parlament palatalarynyń, Úkimettiń, Konstitýtsiialyq Keńestiń, memlekettik organdarda qurylǵan alqalyq jáne basqa da organdardyń, sondai-aq máslihattardyń otyrystaryna qatysýǵa; adamnyń jáne azamattyń quqyqtary men bostandyqtaryn buzǵan adamǵa qatysty tártiptik nemese ákimshilik is júrgizý ne qylmystyq isti júzege asyrý týraly ótinishhatpen memlekettik organdarǵa nemese laýazymdy adamdarǵa júginýge; memlekettik apparattyń sheshimderimen nemese áreketterimen (áreketsizdigimen) buzylǵan shektelmegen adamdar tobynyń quqyqtary men bostandyqtaryn qorǵaý úshin talap aryzben (talap qoiýmen) sotqa júginýge jáne basqalar. Mundai sharalar sózsiz Ombýdsmen institýtyn nyǵaitady», - dedi Senat tóraǵasynyń orynbasary.
Talqylaý barysynda Senat depýtattary zań jobasyna túzetýler engizip, Májiliske qaitardy.
