QR Premer-Ministri Asqar Maminniń tóraǵalyǵymen ótken Úkimet otyrysynda basym emes biýdjet shyǵystaryn qysqartý boiynsha qabyldanyp jatqan sharalar týraly Premer-Ministrdiń birinshi orynbasary – qarjy ministri Álihan Smaiylov baiandady, dep habarlaidy "Ult aqparat" primeminister.kz saityna silteme jasap.
Prezident 24 qańtarda memlekettik jáne kvazimemlekettik sektordaǵy basym emes shyǵystardy qysqartý boiynsha jumysty jalǵastyrýdy tapsyrdy. Osy tapsyrmany oryndaý úshin shyǵystardy taldaý boiynsha jumys júrgizildi jáne olardy qysqartý boiynsha usynystar ázirlendi. Á. Smaiylov atap ótkendei, bul usynystar aǵymdaǵy jyldyń biýdjetin naqtylaý jáne kelesi úsh jyldyq kezeńge arnalǵan biýdjetti qalyptastyrý kezinde júzege asyrylatyn bolady.
«Jalpy alǵanda shyǵystardy ońtailandyrý boiynsha jalpy somasy 128,6 mlrd teńgege usynystar berildi, onyń ishinde memlekettik organdardan – 23 mlrd teńge, óńirlerden – 26,6 mlrd teńge jáne kvazimemlekettik sektor sýbektilerinen – 79 mlrd teńge», — dedi Á. Smaiylov.
Memlekettik biýdjet boiynsha ońtailandyrýǵa mynadai shyǵystar usynyldy: seminarlar, konferentsiialar ótkizýge, avtokólik, jihaz satyp alýǵa arnalǵan shyǵystar – 4,2 mlrd teńge, issapar, ókildik shyǵystar, taldamalyq zertteýler – 15,7 mlrd teńge, ózge de ónimdi emes shyǵystar – 29,7 mlrd teńge.
Óz kezeginde Qarjy ministrliginiń 2018-2019 jyldary biýdjetti atqarý negizinde ázirlengen shyǵystardy ońtailandyrý, biýdjet zańnamasynyń jańa normalary, sondai-aq investitsiialyq jobalardyń tolyq jáne ýaqtyly igerilýin baǵalaýda shyǵystardy ońtailandyrý boiynsha qosymsha usynystary bar. Osyǵan sáikes, ákimshilermen birlesip 2020 jylǵa arnalǵan biýdjetti naqtylaý kezinde eskerý úshin shyǵystardy qosymsha ońtailandyrý máselesi pysyqtalatyn bolady.
Óńirler 26,6 mlrd teńge somasynda qarajatty ońtailandyrýdy usyndy, onyń 72,5% Almaty jáne Túrkistan oblastarynyń, sondai-aq Almaty qalasynyń usynystary.
Sondai-aq Qarjy ministrligi 2019 jylǵa jergilikti biýdjetterdiń atqarý qorytyndylaryn qarady.
«Biz ótken jyly óńirlerdiń kiristeri asyra oryndalǵanyn kórip otyrmyz, sonymen qatar, biýdjet qarajatynyń bos qaldyqtary qalyptasty. Osyǵan bailanysty, respýblikalyq biýdjetten nysanaly transfertter esebinen iske asyrylatyn jobalar boiynsha óńirlerdiń qosa qarjylandyrý úlesin qosymsha 7%-ǵa ulǵaitý usynylady», — dedi Á. Smaiylov.
Onyń aitýynsha, bul shara respýblikalyq biýdjette qosymsha 36,9 mlrd teńgege qarajatty bosatady.
Odan basqa, 2020-2022 jyldarǵa arnalǵan biýdjetti Parlamentte qorǵaý sheńberinde Úkimet dividendik saiasatty qaita qaraý boiynsha mindetteme qabyldady, onyń nátijeleri biýdjetti naqtylaý kezinde usynylatyn bolady.
