Semei qalasyndaǵy dene shynyqtyrý-saýyqtyrý keshenine Olimpiada chempiony Jaqsylyq Úshkempirovtiń esimi berildi, dep habarlaidy "Ult aqparat" Semei qalasynyń aqparat ortalyǵyna silteme jasap.
Dene shynyqtyrý-saýyqtyrý kesheninde ótken saltanatty sharaǵa oblys ákimi Danial Ahmetov qatysty.
«Sport keshenine Jaqsylyq Úshkempirovtyń esiminiń berilýi meni qýantady. Ol sportta aty ańyzǵa ainalǵan tulǵa ǵana emes, eńbektiń shyńyna shyqqan qairatker. Árbir qazaqstandyq osyndai bolýy kerek. Kelesi jyldan bastap Olimpiada chempiony Jaqsylyq Úshkempirovtyń júldesine arnalǵan jarys ótkizýdi josparlap otyrmyz. Ol týrnir jyl saiyn balalar men jastar arasynda ótkiziledi», - dedi Danial Ahmetov.
Semei - sportshynyń ómirinde tereń iz qaldyrǵan qala. Olimpiada chempiony jas kezinde qart Semeidegi zoovetinstitýtta oqyǵan.
Jaqsylyq Úshkempirov 1951 jyly 6 mamyrda Qazaq KSR Jambyl oblysy Sverdlov aýdany «Chapaev» sovhozynda dúniege kelgen. Ol - KSRO eńbek sińirgen sport sheberi, Qazaq KSR eńbek sińirgen jattyqtyrýshysy, klassikalyq kúresten Olimpiada chempiony, erkin kúresten Qazaq KSR chempiony, álem chempiony (1981), álem kýbogynyń ekinshi júldegeri (1982), Eýropa chempionatynyń ekinshi júldegeri (1980), KSRO eki dúrkin chempiony (1975, 1980), KSRO chempionatynyń kúmis júldegeri (1978, 1979), KSRO chempionatynyń qola júldegeri (1973, 1977) jáne KSRO halyqtarynyń spartakiadasynyń chempiony (1975).
