Semeide 54 million teńgeniń zańsyz temeki ónimi tárkilendi, dep habarlaidy QazAqparat Qarjylyq monitoring agenttigine silteme jasap.
Shyǵys Qazaqstan oblysy boiynsha Ekonomikalyq tergep-tekserý departamentiniń qyzmetkerleri Semei qalasynda temeki ónimin zańsyz ótkizýdi anyqtady.
«Is figýranttaryna tiesili saýda oryndary, qoimalar, mashinalarda júrgizilgen tintý nátijesinde túrli ataýdaǵy aktsizdik markasyz 116 myńnan astam temeki tárkilendi. Júrgizilgen saraptamaǵa sáikes temeki óniminiń quny 54 million teńgege baǵalanady», delingen habarlamada.
Atalǵan fakti boiynsha sotqa deiingi tergep-tekserý júrgizilip jatyr.
Vedomstvonyń málimdeýinshe, temeki ónimderiniń zańsyz naryǵy ulttyq deńgeide qaýip. Bul sapasyz taýar nemese salyq tólemeý ǵana emes, sonymen birge qoǵam men memleketke aitarlyqtai qater tóndiredi.
Birinshiden, bul qylmys deńgeiiniń ósýi jáne kriminogendik jaǵdaidyń nasharlaýy. Ekinshiden, kontrafakt temeki qoǵamdyq densaýlyqqa, ásirese jas urpaqqa tikelei qaýip tóndiredi. Úshinshiden, álemde jyl saiyn shamamen 400 milliard zańsyz temeki satylady.
Temeki óniminiń zańsyz naryǵynyń álemdik aýqymy kóleńkeli sektordyń damýyna yqpal etip qana qoimai, tutastai alǵanda ekonomikaǵa zardap tigizedi.
