Semei qalasynda órt sóndirýshiler jalyn sharpyǵan dúkennen 6 gaz ballonyn syrtqa shyǵaryp úlgerdi, dep habarlaidy "Ult aqparat".
ShQO Tótenshe jaǵdailar departamenti baspasóz qyzmetiniń málimetine súiensek, Gagarin kóshesindegi dúkende shatyrdyń aǵash qurylymdary men nan pisiretin elektr peshi órtengen. Oqiǵa ornyna órt sóndirýshiler shuǵyl kelip jetti.
«Tilsiz jaýdyń jalpy aýdany 15 sharshy metrdi quraǵan. Qyzyl jalyndy aýyzdyqtaý barysynda qutqarýshylar dúkennen 6 gaz ballonyn syrtqa alyp shyqty. Zardap shekken eshkim joq», - dep habarlady vedomstvo ókilderi.
Órtti óshirýge jeke quramnan 13 adam men 3 tehnika jumyldyrylǵan. Ot elektr jabdyqtaryn paidalaný kezinde órt qaýipsizdigi talaptarynyń saqtalmaýynan shyǵýy múmkin.
