Semei qalasynda monshada órt shyǵyp, 30 adam evakýatsiialandy, dep habarlaidy "Ult aqparat".
ShQO Tótenshe jaǵdailar departamenti baspasóz qyzmetiniń málimetine súiensek, Krasin kóshesinde ornalasqan birqabatty monshany qyzyl jalyn sharpyǵan. Oqiǵa ornyna órt sóndirýshiler shuǵyl kelip jetti.
«Olar birinshi kezekte qatty tútindengen aimaqtan 30 adamdy, onyń ishinde 10 balany evakýatsiialady. Kóp uzamai jalpy aýdany 15 sharshy metrdi quraǵan tilsiz jaý aýyzdyqtalyp, onyń ary qarai taralýyna jol berilmedi. Qaza bolǵandar men zardap shekkender joq. Órtti sóndirýge barlyǵy jeke quramnan 15 adam jáne 4 tehnika jumyldyrylǵan», - dep habarlady vedomstvo ókilderi.
Qazirgi ýaqytta, zerthana mamandary jalynnyń shyǵý sebebin anyqtap jatyr.
