Semei qalasynda quny 100 mln teńgeden asatyn marihýana men gashish tárkilendi, dep habarlaidy "Ult aqparat".
Qalalyq Politsiia basqarmasy esirtki qylmysyna qarsy is-qimyl jáne kriminaldyq politsiia bólimderiniń qyzmetkerleri Jedel áreket etý arnaiy jasaǵymen birlesip aýqymdy operatsiia júrgizdi.
Shara barysynda 44 jastaǵy semeiliktiń kannabis tobyna jatatyn esirtki zattarynyń asa iri partiiasyn satpaq bolǵany anyqtaldy. Tintý kezinde jedel ýákilder 1,5 tsentnerden astam keptirilgen marihýana men 10 keli gashishti tárkiledi.
«Sondai-aq onyń garajynan 153 keliden astam marihýana tabyldy. Kúdikti esirtkini shahar turǵyndaryna satpaq bolǵan. Tárkilengen esirtki sany 32 myń bir rettik doza. Olardyń «qara naryqtaǵy» baǵasy 100 mln teńge asady», - dedi ShQO PD bastyǵynyń orynbasary Talǵat Shaiahmetov.
Qazirgi ýaqytta kúdikti qamaýǵa alynǵan. Qylmystyq kodekstiń 297-baby 3-bóligine sáikes sotqa deiingi tergeý amaldary júrgizilýde. Er adam 15 jylǵa deiin bas bostandyǵynan aiyrylýy múmkin.
