Semei qalasynda órt shyqqan kópqabatty úiden 31 adam qutqarylyp, 50 turǵyn evakýatsiialandy, dep habarlaidy QazAqparat.
ShQO tótenshe jaǵdailar departamenti baspasóz qyzmetiniń málimetine súiensek, Fizkýltýrnaia kóshesindegi 9 qabatty úide órt shyqqan.
Qyzyl jalyn altynshy qabattaǵy páterde jihaz ben jeke zattardy sharpydy.
«Oqiǵa ornyna qutqarýshylar jedel kelip jetti. 6-qabatqa deiin avtosatyny kóterip, 16 jáne 14 jastaǵy eki balany tútin tumshalaǵan úiden alyp shyqty. Olar ýlaný belgisimen meditsinalyq mekemege jetkizildi. Taǵy 31 turǵyn, onyń ishinde 14 bala órt sóndirýshilerdiń kómegimen baspaldaq arqyly qutqaryldy», - delingen aqparatta.
Balalaryn óz betimen qutqarmaq bolǵan 42 jastaǵy páter iesi kúiik alyp, aýrýhanaǵa jatqyzyldy.
Sondai-aq TJD qyzmetkerleri qaýipti aimaqtan 50 adamdy, onyń ishinde 15 balany evakýatsiialady.
«Tilsiz jaýdy aýyzdyqtaýǵa jeke quramnan 40 adam jáne 10 tehnika jumyldyrylǵan. Aldyn ala málimet boiynsha órttiń shyǵý sebebi – elektr jabdyqtaryn paidalaný kezinde qaýipsizdik talaptaryn saqtamaýdan», - delingen habarlamada.
