Semei qalasynda eki adamdy qaǵyp óltirgen taksist áiel 8 jylǵa bas bostandyǵynan aiyryldy, dep habarlaidy "Ult aqparat".
Shyǵys Qazaqstan oblysy boiynsha Qylmystyq-atqarý júiesi departamenti baspasóz qyzmetiniń málimetinshe, jol kólik oqiǵasy «Óskemen-Semei» tasjolynda bolǵan.
«42 jastaǵy semeilik Toyota Camry kóligimen Óskemenge qarai jolaýshy tasymalymen ainalysqan. Jolaýshylardyń aitýynsha, kólik tizgindegen áiel áleýmettik jelide otyryp, uialy telefonmen jii sóilesti. Jolǵa nazar aýdarmaǵan ol jyldamdyqty da bekitilgen shekten asyryp jibergen. Aldynda kele jatqan avtogreiderdi ozyp ótpek bolǵanda qarsy baǵyttaǵy Lada kóligimen soqtyǵysty», - delingen habarlamada.
Jol apaty saldarynan Lada kóligindegi eki adam oqiǵa ornynda kóz jumdy. Al Toyota Camry kóliginiń tórt jolaýshysy túrli dene jaraqattaryn alǵan. Sondai-aq sottalýshynyń júrgizýshi kýáligi bolmaǵandyǵy anyqtaldy.
Ulan aýdandyq sotynyń úkimimen aiyptalýshy QR QK-niń 345-baby 4-bóligi boiynsha 8 jylǵa bas bostandyǵynan aiyryldy. Ol óz jazasyn qaýipsizdigi minimaldy túzetý mekemesinde óteýde.
