Shyǵys Qazaqstan oblysy Semei qalasynda jedel járdem stantsiiasynyń júrgizýshileri basshylyqtyń ózderin aqysyz demalysqa jibergenine narazy.
31 naýryzda onnan astam júrgizýshi qalalyq prokýratýraǵa jinalyp, jumys berýshi sheshiminiń zańdylyǵyn tekserýdi surady, dep habarlaidy Azattyq.
— 20 adamdy (bes brigada) aqysyz demalysqa jiberdi. Endi taǵy qalǵandaryn jibereiin dep jatyr. Úsh ai boiy jalaqysyz qalai kún kóremiz? — dedi júrgizýshi Serik Jumaǵaliev.
Onyń áriptesteriniń aitýynsha, basshylyq sheshimge qarsy shyqqandar óz betimen jumystan ketý týraly aryz jazyp, kete berse bolady degen.
Júrgizýshiler jedel járdem brigadasy qysqarsa, qaladaǵy ahýalǵa áser etýi múmkin dep alańdaidy.
— Brigada jumysshylaryn qysqartpai-aq jaǵdaidan shyǵýdyń basqa amaldaryn qarastyrý kerek. Indet kezinde salmaq negizinen osy brigadalarǵa tústi. Eger bizde Almatydaǵydai naýqastar kóbeise, jedel járdem stantsiiasy salmaqqa shydai almaýy múmkin. Indet kezinde jedel járdemdi keshki saǵat 6-da shaqyrǵandarǵa úlgermegendikten tańǵy saǵat 6-da barǵan kezder boldy. Jáne bir ret qana emes. Bir brigada joq bolsa joǵy bilinip qalady, — deidi stantsiia qyzmetkerleriniń biri.
Stantsiianyń bas dárigeri Vladimir Li optimizatsiiaǵa bailanysty 5 brigadany aqysyz demalysqa jiberý týraly sheshim qabyldanǵanyn aitty.
— Indetke qaramastan jedel járdem shaqyrýǵa suranys jyldan jylǵa tómendep barady. Osy jyldy saraptai kele 1 sáýirden bastap brigadalar sanyn azaittyq. Ujymdyq kelisim-shartqa sáikes, qyzmetkerlerge aqysyz demalysqa shyǵý usynyldy. Basym bóligi kelisti, bir adam ǵana kelispedi, ol ózine taǵy birneshe adamdy tartty. Biraq bizde kólikterdi jumystan shyǵarý kestesi bar. Qazir bes kólik ketti, eki aidan soń taǵy beseýi ketedi. Jyldyń sońyna deiin solai jalǵasa beredi, – deidi Vladimir Li.
Ol stantsiianyń kúrdeli qarjy jaǵdaiyna da toqtaldy. Onyń sózine qaraǵanda, kásiporyn "jalaqy shyǵyndaryna" bailanysty 2020 jyldy qaryzben japqan. Qazir mekemede aýdittik tekseris júrip jatyr. Qaryzdyń jinalýynyń sebebin anyqtaidy.
Degenmen bas dáriger naqty kórsetkish joǵyn alǵa artyp, qaryz kólemin aitpady. Buǵan deiin bas dáriger mindetin atqarǵan adam kásiporynnyń qaryzy – shamamen 260 mln teńge dep aitqan edi.
Bas dáriger qyzmetkerlerge basshylyq qysym jasady degen aqparatty joqqa shyǵaryp, turǵyndar saǵattap jedel járdem kómegin kútti degen aqparatty da rastamady.
Densaýlyq saqtaý ministrliginiń buiryǵyna sáikes, 10 myń halyqqa kem degende bir jedel járdem brigadasy kerek. Semeide 320 myń adam turady. Stantsiianyń bas dárigeriniń aitýynsha, qyzmetkerlerdi aqysyz demalysqa jibergennen keiin qalada 30 brigada qalady.
