Semei qalasynda 3 jasar bala altynshy qabattan qulap kóz jumdy, dep habarlaidy QazAqparat.
ShQO Tótenshe jaǵdailar departamenti baspasóz qyzmetiniń málimetine súiensek, oqiǵa 27 maýsym kúni saǵat 17-00 shamasynda Panfilov kóshesinde bolǵan. 6-qabatta ornalasqan páterdegi ashyq terezeden 3 jasar bala qulap, kóz jumdy. Balanyń anasy sol ýaqytta kórshi bólmede bolǵan.
«Kóp jaǵdaida balalardyń terezeden qulaý sebepteri - terezeleri ashyq úide qaraýsyz qalý, terezelerde qaýipsizdikti qamtamasyz etetin arnaiy temir tordyń jáne ózge de qurylǵylardyń bolmaýy, tereze janynda ústeldiń, oryndyq pen divannyń ornalasýy. Sondai-aq qorǵanysh bolyp kórinetin moskit torlary da úlken qaýip tóndiredi», - dep habarlady vedomstvo ókilderi.
Osy rette, qutqarýshylar óńir jurtshylyǵyna qaýipsizdik sharalaryn únemi qaperde ustaý kerektigin eskertti.
