QR Energetika ministri Maǵzum Myrzaǵaliev «Semei iadrolyq qaýipsizdik aimaǵy týraly» zań jobasy qandai máselelerdi sheshýge kómektesetinin aitty, dep habarlaidy QazAqparat tilshisi.
Parlament Májilisinde Energetika ministri «Semei iadrolyq qaýipsizdik aimaǵy týraly» jáne «Qazaqstan Respýblikasynyń keibir zańnamalyq aktilerine Semei iadrolyq qaýipsizdik aimaǵy máseleleri boiynsha ózgerister men tolyqtyrýlar engizý týraly» QR Zań jobalaryn usyndy.
Qaralyp otyrǵan zań jobasy burynǵy Semei poligony jerlerin paidalaný, onyń aýmaǵyn ońaltý, eldiń ǵylymi áleýetin damytý máselelerinde baqylaýdy kúsheitýge baǵyttalǵan.
«Ózekti problemalardy sheshý úshin zań jobalarynda mynadai sharalar usynylady: tiimdi basqarý maqsatynda jańa jer sanatyn – «iadrolyq qaýipsizdik aimaǵynyń jerlerin» engizý; Semei iadrolyq qaýipsizdik aimaǵynyń jumystaryn oryndaýǵa jaýapty bolatyn Energetika ministrliginiń vedomstvolyq baǵynysty uiymyn taǵaiyndaý; keshendi ekologiialyq tekserý jáne memlekettik ekologiialyq saraptama nátijeleri boiynsha normadan tys radiatsiialyq lastanǵan jáne shartty taza aýmaqtardyń shekaralaryn aiqyndaý; poligonnyń lastanǵan jerleriniń mártebesin «zapastaǵy jerler» sanatynan «iadrolyq qaýipsizdik aimaǵynyń jerleri» sanatyna ózgertý jáne lastanǵan jerlerde Semei iadrolyq qaýipsizdik aimaǵyn qurý, jerlerdi aýystyrý, shekaralar men alańdardy Úkimet qaýlysymen aiqyndaý; radiatsiialyq jaǵdaiǵa monitoring júrgizý jáne baqylaý; lastanǵan ýchaskelerdi ońaltý jáne qalyptasqan radioaktivti qaldyqtardy saqtaý pýnktin salý; mamandandyrylǵan aimaqta iadrolyq qaýipsizdikti qamtamasyz etý sharalaryn uiymdastyrý», - dedi Maǵzum Myrzaǵaliev Májiliste ótken dóńgelek ústelde.
Sondai-aq, ministr normadan tys lastanǵan aimaqta jumys isteitin Energetika ministrliginiń vedomstvolyq baǵynysty uiymy retinde QR Ulttyq iadrolyq ortalyǵyn taǵaiyndaý kózdelgenin jetkizdi.
