QR Energetika ministri Maǵzum Myrzaǵaliev Semei iadrolyq poligony jabylǵannan keiin týyndaǵan máselelerdi aityp berdi, dep habarlaidy QazAqparat tilshisi.
Parlament Májilisinde Energetika ministri «Semei iadrolyq qaýipsizdik aimaǵy týraly» jáne «Qazaqstan Respýblikasynyń keibir zańnamalyq aktilerine Semei iadrolyq qaýipsizdik aimaǵy máseleleri boiynsha ózgerister men tolyqtyrýlar engizý týraly» QR Zań jobalaryn usyndy. Qaralyp otyrǵan zań jobasy burynǵy Semei poligony jerlerin paidalaný, onyń aýmaǵyn ońaltý, eldiń ǵylymi áleýetin damytý máselelerinde baqylaýdy kúsheitýge baǵyttalǵan.
«Poligondy jabýmen bailanysty birqatar problemalyq máseleler bar. Semei poligonynyń jerleri jergilikti atqarýshy organdardyń qaramaǵyndaǵy zapastaǵy jer bolyp sanalady, bul bógde adamdardyń is-áreketterin jáne osy aýmaqtarda bolyp jatqan oqiǵalardy qadaǵalaýdy qiyndatady. Odan bólek, poligon jeri úsh oblystyń ákimshilik shekaralarynda ornalasqan, bul da burynǵy poligon aýmaǵynyń qaýipsizdigin qamtamasyz etý máselelerin sheshýdi qiyndatady. Radioaktivti lastaný deńgeiine úzdiksiz monitoringtiń bolmaýy ol lastanýdyń eldimekenderge kóshýi boiynsha mańyzdy derekterdiń bolmaýyna ákep soǵady», - dedi Maǵzum Myrzaǵaliev Májilistegi dóńgelek ústel barysynda.
Ministrdiń aitýynsha, halyq poligonnyń lastanǵan alańdaryna kedergisiz kirip-shyǵyp júr, bul densaýlyqqa ziian keltirýi múmkin. 2008-2017 jyldary burynǵy poligon aýmaǵynda 139 qystaq pen jazǵy úi anyqtalǵan, onyń 68-inde adamdar turady.
«Poligonnyń normativten tys lastanǵan jerlerin qalpyna keltirý jumystary is júzinde júrgizilmeidi. Poligonnyń radioekologiialyq jai-kúiiniń aiqyn kórinisi men turaqty monitoringi joq, zalaldanǵan jáne taza jerlerdiń arasy bólinbegendikten, poligon jerleriniń sharýashylyq ainalymǵa berilýin qiyndatady. Nátijesinde poligonnyń yqtimal jaramdy jerleriniń edáýir bóligi qazir bos jatyr», - dedi ministr.
