Foto: Tengrinews.kz
Qaraǵandyda segiz jastaǵy oqýshy Nuriden Amantai janyp jatqan úiden eki jasar qaryndasyn qutqaryp qaldy. Olardyń úii tolyǵymen otqa oranyp, balalardyń atasy men ájesi kúiikten qaitys boldy boldy, - dep habarlaidy Tengrinews.kz saity.
Órt 2022 jylǵy jeltoqsanda bolǵan. Balanyń órt kezinde qoly men betin kúiik shalǵan. Ol sol qaiǵyly oqiǵa týraly endi ǵana aita alady.
"Órt úide men qaryndasym, atam jáne ájem bolǵan kezde bastaldy. Kireberiste turǵan peshte birdeńe jarylyp ketti. Biz ol ýaqytta as úide tamaqtanyp otyrǵan edik. Atam men ájem dálizge ne bolǵanyn kórý úshin shyǵyp ketip, uzaq ýaqyt oralmady. Sodan keiin olardyń artynan baryp, peshtiń janynda bári janyp turǵanyn kórdim. Dálizden shyǵa almaitynymdy túsindim. As úige júgirip baryp, anama qońyraý shalyp, qaryndasymdy alyp, ony terezeniń aldyna kóterdim. Sodan keiin oǵan ózim kóterilip, Rabiiamen birge sekirgýge daiyndaldym. Osy kezde kórshiler terezege qarai júgirip keldi. Olarǵa qaryndasymdy berdim de, ózim shyqtym", - dedi Nuriden.
Balalardyń ata-ájesi syrtqa shyǵa alǵanymen, deneleriniń 40-60 paiyzyn kúiik shalǵan. Olar Nuridenmen birge aýrýhanaǵa jatqyzyldy.
"Men kelgende úi lapyldap janyp jatty. Kúieýimniń ata-anasyn jan saqtaý bólimine, Nuridendi qarapaiym palataǵa jatqyzdy. Ókinishke qarai, eki kúnnen keiin qaiyn atam qaitys boldy. Taǵy eki aptadan keiin qaiyn enem qaitys boldy. Qazir biz kúieýimizdiń týystarynda eki bólmeli páterde turamyz. Olardyń bes balasy bar", - deidi Nuridenniń anasy Nadira Aqyshova.
Nadiranyń jubaiymen birge tórt balasy bar. Órt kezinde 10 jastaǵy uly men 13 jastaǵy qyzy mektepte bolǵan. Qazir otbasy baspanaǵa muqtaj.
