QR Densaýlyq vitse-ministri - Bas memlekettik sanitar dáriger Erlan Qiiasov Májilistiń jáne jergilikti máslihattardyń depýtattaryn sailaýdy uiymdastyrý jáne ótkizý kezinde halyq arasynda koronavirýs infektsiiasynyń taralýynyń aldyn alý, azamattardyń ómiri men densaýlyǵyn qorǵaý maqsatynda arnaýly qaýly qabyldady, dep habarlaidy "Ult aqparat".
Atalǵan qaýlyǵa sáikes, sailaý protsesiniń barlyq qatysýshylary: bir ret qoldanylatyn meditsinalyq nemese qorǵanysh maskalaryn, qolǵaptardy kiiý rejimin mindetti túrde saqtaýy; qoldy dezinfektsiialaý úshin antiseptikalyq quraldardy paidalanýy; adamdar arasynda bir-birinen keminde 1,5-2 metr áleýmettik qashyqtyqty saqtaýy; qol alysýdy nemese tikelei bailanystyń basqa da túrlerin boldyrmaýy qajet. Sailaý aldy úgit is-sharalaryn teledidar, radio, baspa basylymdaryn, internet-resýrstardy paidalana otyryp, onlain rejimde ótkizý usynylady. Sailaý naýqany úshin arnaiy daiyndalǵan tegin baspa materialdaryn, onyń ishinde illiýstratsiialyq materialdardy, sondai-aq belgishelerdi, jalaýlardy, jalaýshalardy taratýdy bir ret qoldanylatyn qolǵaptardy jáne qorǵanysh maskalaryn paidalana otyryp júzege asyrý kerek.
«Sailaý aldy kópshilik is-sharalaryn jáne úi-jai ishinde sailaýshylarmen jeke kezdesýlerdi ótkizý kezinde: áleýmettik qashyqtyqty múltiksiz saqtaý úshin jetkilikti keń úi-jailardy paidalanýdy; is-sharaǵa qatysýshylardyń temperatýrasyn úi-jaiǵa kireberiste bailanyssyz baqylaýdy; úi-jaiǵa kireberiste jáne úi-jai ishinde qoldy dezinfektsiialaýǵa arnalǵan quraldardy paidalanýdy; jýý quraldaryn qoldana otyryp, úi-jaidy jáne barlyq jumys betterine ylǵaldy jinaý júrgizýdi, dezinfektsiialaýdy; jasandy jeldetý júiesi bolmaǵan jaǵdaida úi-jaiǵa turaqty jeldetý júrgizýdi; ǵimarattyń tehnikalyq múmkindikteri bolǵan kezde úi-jaiǵa bólek kiretin jáne shyǵatyn joldardy; KVI-diń profilaktikasy sharalaryn saqtaý týraly aqparattyq materialdardy ornalastyrýdy; úi-jaiǵa kireberiste jáne úi-jai ishinde qashyqtyq belgilerin ornatýdy; qatysýshylardy áleýmettik qashyqtyqty saqtai otyryp otyrǵyzýdy qamtamasyz etý qajet», - delingen qaýlyda.
