Saiasi partiia retinde tirkelý týraly ótinish bergen bastamashyl toptardyń tiziminde qaitys bolǵan adamdar men áskeriler bolǵan. QR Ádilet ministri Marat Beketaev ortalyq kommýnikatsiialar qyzmetinde ótkne brifingide osyndai málimet berdi, dep habarlaidy QazAqparat.
«Negizgi qatelikterge kelsek, usynǵan tizimderde ómirden ótken adamdar men basqa partiianyń músheleri, áskeri adamdar boldy. Osyndai qatelikteri bar», - dedi ministr BAQ ókiliniń suraǵyna bergen jaýabynda.
Onyń aitýynsha, mundai kemshilik zańǵa qaishy.
«Birinshiden, bastamashyl top bir myń adamnyń tizimin ákelý kerek. Osy tizimde qaitys bolǵan adamdar bolsa, basqa partiialardyń músheleri bolsa, áskeri adamdar bolsa, árine, biz oǵan eshqandai qujat bere almaimyz. Óitkeni ol zańǵa sáikes kelmeidi», - den naqtylady Marat Beketaev.
Ministrdiń pikiri boiynsha, qujatyn saýatty jinap ákelgen uiymdardyń tirkelýine eshqandai kedergi qoiylyp otyrǵan joq.
«Biz Qazaqstandy bul máselede ózge eldermen salystyrmaimyz. Óitkeni bizdiń ómirimiz basqa. Óz jolymyz bar jáne ahýal da basqa. Bul sheshimge tek men nemese ministrlik qana emes, basqa da kóptegen sarapshylarmen jan-jaqtan qaraýy arqyly keldik. Ol zańdy Parlament qabyldap, Prezident qol qoidy. Eger myqty adamdar bas biriktirse, qujattardyń bári zań boiynsha engizse, árine olaryń partiiasy tirkeledi», - dedi Ádilet ministri.
