Elordaǵa koronavirýsqa qarsy vaktsinanyń qosymsha dozasy jetkiziledi. Bul jaiynda Nur-Sultan qalasynyń ákimi Altai Kólginov Instagram paraqshasynda jazdy, dep habarlaidy "Ult aqparat".
«Ár turǵyn karantin men onyń saldaryn sezindi. Búgin biznes ókilderimen, Nur-Sultan qalasynyń kásipkerler palatasymen, sanitarlyq dárigerlermen shaǵyn jáne orta biznesti qoldaý sharalaryn, ekpe alý pýnktterin ashý, sanitarlyq normalardy qatań saqtai otyryp, keibir biznes sýbektilerine jumys jasai berýge múmkindik beretin « Ashyq » jobasyn masshtabtaý máseleleri talqylandy», - dedi ol.
Onyń atap ótýinshe, koronavirýspen kúreste óte mańyzdy ádis – vaktsinatsiia men ujymdyq immýnitetti qalyptastyrý.
«Birinshi kezeńde ekpeni koronavirýspen kúreste aldyńǵy shepte júrgen meditsina qyzmetkerleri, muǵalimder, politsiia qyzmetkerleri jáne taǵy basqalary alyp jatyr. Sáýir aiynan bastap halyqty vaktsinatsiiamen keńinen qamtýǵa kirisemiz. Memleket basshysynyń tapsyrmasyna sáikes Densaýlyq saqtaý ministrligi «SK-Farmatsiiamen» birlese halyqty barynsha qamtý úshin qalaǵa vaktsinalardyń qosymsha dozasyn jetkizedi», - dedi Altai Kólginov.
