Foto: Tengrinews.kz
Qazgidromet kóktemgi egis aldynda topyraqtaǵy ylǵal qoryna boljam jasady. Sinoptikterdiń málimetinshe, birqatar óńirde ylǵal tapshylyǵy saqtalady, - dep habarlaidy "Ult aqparat".
"Jalpy, qalyptasqan jaǵdailar eldiń soltústigindegi astyq egetin óńirler úshin qolaily bolady, alaida Qazaqstannyń batysynda, ortalyq jáne shyǵys bólikterinde sáýir aiynda jaýyn-shashyn tapshylyǵy bolýy múmkin, bul damýdyń bastapqy kezeńinde aýyl sharýashylyǵy daqyldarynyń ósýi men damýyna teris áser etýi múmkin", - delingen habarlamada.
Esepteýler kórsetkendei, kóktemgi egis jumystarynyń aldynda Qazaqstan aýmaǵyndaǵy egistikterdiń ylǵalmen qamtamasyz etilýi kútilýde:
- ońtaily deńgeiden qanaǵattanarlyq deńgeige deiin - Abai, Shyǵys Qazaqstan, Jambyl jáne Almaty oblystarynda;
- qanaǵattanarlyq - Batys Qazaqstan, Aqtóbe, Qaraǵandy, Aqmola, Qostanai, Pavlodar jáne Soltústik Qazaqstan oblystarynda;
- ońtaily - Jetisý jáne Túrkistan oblystarynda.
Kóktemgi egis jumystary kezindegi ylǵal qory týraly málimetter egis alqaptarynyń qurylymyn anyqtaýda, daqyldardy sebýdiń ońtaily normalaryn anyqtaýda, tuqymdardy otyrǵyzý tereńdigin tańdaýda jáne tyńaitqyshtardy engizýde mańyzdy ról atqarady, bul sońynda jalpy ónimniń sapasy men shyǵymdylyǵyna jáne óndirilgen ónimniń ózindik qunyna áser etedi.
Kóktemgi egis jumystarynyń bastalýyna qarai topyraqtaǵy ylǵal qorynyń naqty boljamy shamamen 25 sáýirde ázirlenbek.
