Aqmola oblysynyń saýda ortalyqtarynda et ónimderin satý boiynsha kóptegen zańbuzýshylyqtar anyqtaldy. Bul týraly QR sybailas jemqorlyqqa qarsy is-qimyl agenttiginiń Aqmola oblysy boiynsha arnaiy monitoring toby habarlady, dep jazady QazAqparat.
Baspasóz málimetterine qaraǵanda, Aqmola oblysy boiynsha arnaiy monitoringtik top músheleri «Aqmola – adaldyq alańy» jobalyq keńsesiniń ókilderimen birlesip Kókshetaý qalasynyń saýda ortalyqtaryndaǵy aýyl sharýashylyǵy ónimderin júzege asyrýda sanitarlyq normalardyń ustanylýyna monitoring júrgizdi.
Monitoring barysynda jumys tobynyń músheleri tamaq ónimderiniń kóterme jáne bólshek saýda obektilerine qoiylatyn sanitariialyq-epidemiologiialyq talaptardyń birneshe márte buzylǵandyǵyn anyqtady. Mysalǵa, saýda ortalyqtaryndaǵy et saqtaýǵa arnalǵan muzdatqysh kameralar qajettilik týǵan kezde jýylmaidy. Siyr etin saqtaý úshin osyndai kameralardyń ishinde qorǵanys qaqpaqshalary joq shamdar qoldanylady. Bul et ónimderine áinek siiaqty qaýipti qaldyqtardyń túsýinen qorǵamaidy. Sonymen qatar, temperatýra ólsheý úshin qajetti baqylaý-ólsheý qurylǵylarynyń joqtyǵy anyqtaldy. Etti satylymǵa shyǵarýǵa qajetti sóreler nemese vitrinalar da joq eken.
Muzdatylǵan etti satý sharttary saqtalmaidy. Etti túpqoimasyz, jerde saqtaityn jaǵdailar da anyqtaldy. Et shabatyn bólmede qol jýýǵa arnalǵan shuńǵylshalar ornatylmaǵan.
Et tasymaldaý qyzmetine qatysty da kóptegen eskertýler jasaldy. Arnaiy transporttyq qural bolmaǵandyqtan et jeńil avtokólikpen tasymaldanady. Kóliktiń ishki joǵarǵy qabaty tazalanbaityn, jýylmaityn jáne zararsyzdandyrylmaityn, azyq ónimderin lastanýdan, janýarlardyń, kemirgishter men qurt-qumyrsqalardyń kirýinen saqtamaityn materialdan jasalǵan.
Sonymen qatar jumysshylardyń aljapqyshtan basqa arnaiy kiimmen tolyq qamtamasyz etilmeitini anyqtaldy. Jeke jáne arnaiy kiimdi bólek saqtaýǵa arnalǵan kiim iletin bólme qarastyrylmaǵan.
Ótkizilgen monitoring qorytyndysy boiynsha Arnaiy monitoringtik top músheleri saýda ortalyqtarynyń ielerine anyqtalǵan kemshilikterdi joiý boiynsha tiisti usynymdar engizdi. Sonymen qatar, ýákiletti memlekettik organdar men uiymdardyń qatysýymen arnaiy jinalys ótkizip, osyndai zań buzýshylyqtarǵa aldaǵy ýaqytta jol bermeý máselesin talqylaý josparlanyp otyr.
