Qaraǵandyda sot Sátbaev qalasynda oryn alǵan jappai tártipsizdikke qatysýshylarǵa úkim shyǵardy, dep habarlaidy "Ult aqparat".
Atalǵan is boiynsha barlyǵy 55 adam sot aldynda jaýap berip jatyr.
Olar «Tártipsizdik uiymdastyrý jáne qatysý» jáne «Bilik ókiline qatysty zorlyq-zombylyq qoldaný» baptary boiynsha aiyptaldy.
Is boiynsha 4 adam tártipsizdikti uiymdastyrýshy dep tanyldy.
45 sottalýshy qamaýda, al 10 adam úi qamaýynda.
Sottalýshylar protsessýaldyq kelisim jasasty.
Qaraǵandy oblysy kámeletke tolmaǵandar isi jónindegi mamandandyrylǵan aýdanaralyq sotynyń sýdiasy Kenjebai Ysqaqbaev búgin sot úkimin jariia etti.
Úkimge sáikes, 9 sottalýshyǵa 3 jylǵa bas bostandyǵynan aiyrý jazasy taǵaiyndaldy, ony olar ortasha jáne tótenshe qaýipsiz QAJ mekemesinde óteidi.
Sot 44 sottalýshyny tórt jylǵa shartty túrde bas bostandyǵynan aiyrdy. Taǵy ekeýin shartty túrde bir jarym jylǵa sottady.
Belgili bolǵandai, sottalǵandar jergilikti politsiia bólimi men pedofildiń kórshilerine kelgen materialdyq zalaldy ótegen.
Tártip saqshylarynyń avtokólikterine keltirilgen zalal 26 million teńgeni qurady.
Esterińizge sala keteiik, ótken jyldyń 23 shildesinde Sátbaev qalasynda 5 jasar bala joǵalyp ketken bolatyn. Qyz bala 62 jastaǵy kúdiktiniń páterinen tabyldy.
Balanyń urlanǵany jaily jańalyqty estigen ondaǵan qala turǵyny kúdiktiniń úiine baryp, ony óz betinshe jazalamaq bolǵan.
Saldarynan qalada jappai tártipsizdikter bastaldy.
Kúdiktige qatysty jas balany urlaý jáne zorlaý faktisi boiynsha sotqa deiingi tergeý bastaldy.
Er adam ustaldy, keiin ony Qaraǵandy tergeý izoliatorynyń kamerasyna qamaǵan. Alaida birneshe kúnnen soń ol óz ózine qol jumsaǵan bolatyn.
