Sátbaev qalasynda bes jasar qyzdy urlaý isi el Prezidenti Qasym-Jomart Toqaevtyń jeke baqylaýynda. Bul týraly Qaraǵandy oblysynyń ákimi Jeńis Qasymbek aimaq turǵyndaryna arnalǵan beineúndeýde málim etti, dep habarlaidy "Ult aqparat".
Oblys ákimi kúdiktiniń ustalǵanyn, qazir barlyq qajetti tergeý sharalary júrgizilip jatqanyn aitty. Qyz ata-anasymen birge úiinde.
Óńir basshysy balanyń densaýlyǵyn úzdik mamandar qadaǵalaitynyna sendirdi.
«Ókinishke qarai, Sátbaevta oqiǵa oryn alǵan túni kinásiz adamdarǵa ziian kelgen. Tártip buzǵandardy toqtatý úshin jeke quram oqiǵa ornyna jumyldyryldy. Men azamattarymyzdyń júreginde narazylyq toly ekenin túsinemin jáne kelisemin. Biraq biz quqyqtyq memlekette ómir súremiz, sondyqtan da emotsiiamyzdy tyiyp, bolǵan jaǵdaidy quqyqtyq alańda qaraýymyz kerek», - dedi Jeńis Qasymbek.
Ol sondai-aq tergeý aiaqtalǵannan keiin kinálini qatań jaza kútip turǵanyn atap ótti.
Esterińizge sala keteiik, biylǵy 23 shildede Sátbaev politsiiasyna er adam bes jasar qyzynyń joǵalǵanyn aityp, aryzdanǵan bolatyn. Qyzdy izdeý jumystaryna jergilikti politsiia bóliminiń barlyq jeke quramy men júzden astam erikti qatysty.
Bala túnde kópqabatty úilerdiń birinen tabyldy. Bul jáit shaharda úlken shý týǵyzdy.
Qazir qalada jaǵdai turaqtandy. Sátbaev kúndelikti rejimde ómir súrip jatyr.
Búgin Ishki ister ministri Erlan Turǵymbaev Sátbaevtaǵy bes jasar qyz balanyń joǵalýyna qatysty oqiǵanyń mán-jaiyn aityp bergen bolatyn.
Sondai-aq, Prezident Shornaq aýyly men Sátbaev qalasyndaǵy jaǵdaiǵa bailanysty keńes ótkizdi.
