Nur-Sultan qalasy ákiminiń orynbasary Ermek Qizatov elordadaǵy menshik úilerge gaz qashan qosylatyny týraly aitty, dep habarlaidy QazAqparat.
«Ózderińiz biletindei, «Saryarqa» magistraldyq gaz qubyrynyń qurylysy jyl sońynda aiaqtalady. Biz qazirgi tańda qalada gaz qabyldaý men taratý jumysyn eki baǵytta júrgizilip jatyr. Birinshisi: gaz taratý kommýnikatsiialaryn «JEO-1» men «JEO-2»-ge tartý jumysy. Gazdyń negizgi tutynýshylary osy eki ortalyq bolady. Astanaǵa keletin gazdyń 90 paiyzyn «JEO-1» men «JEO-2» tutynady. Ekinshi jumys, halyq úshin gaz taratý jelileriniń qurylysyn júrgizý. Jalpy, joǵaryda atalǵan jumystyń jobalyq-smetalyq qujaty ázirlendi. Ol qujat memlekettik saraptamada jatyr», - dedi Ermek Qizatov Energetika ministrliginde ótken otyrystan keiin tilshilerge.
Ákim orynbasarynyń aitýynsha, halyqqa gaz taratý jelileriniń qurylysyn júrgizetin merdigerler bekitilip qoiǵan. Jýyq arada sheshýshi kelisimnen keiin merdigerler jumysqa kirisip ketpek.
«Iaǵni, kelesi jyly halyq jetkizilgen gazdyń qyzyǵyn kóre bastaidy. Elordadaǵy «JEO-1» men «JEO-2»-de jańǵyrtý jumystary kelesi jyldyń naýryz ben shilde ailarynda bastalady. Osylaisha, aldaǵy jyldaekeýin gazǵa aýystyramyz. Bul – aitarlyqtai kúrdeli protsess», - dedi ol.
Sonymen qatar Ermek Qizatov elordada shetindegi aýyldarǵa birinshi gaz beriletinin naqty aita almaitynyn aitty.
«Osy aýylǵa, kóshege nemese úige gaz birinshi barady dep tap basyp aita almaimyn. Sebebi, jospar boiynsha gaz taratatyn jelilerdi salyp jatyrmyz. Iaǵni, árbir adamnyń esik aldyna deiin gaz ákelemiz. Sodan keiin ár úimen jeke kelisimshart jasalyp, úi gaz jelisine qosylady. Endigi jyly shildeniń aiaǵyna qarai menshik úilerge gaz qosýǵa daiyn bolamyz. Tarifke ózgeris bolýy múmkin. Qazir eseptelip jatyr. Qymbattaýy da, arzandaýy da yqtimal. Gaz bizge qandai baǵamen kelse, baǵa soǵan bailanysty bolady», - dedi Ermek Qizatov.
