Búgin Saryaǵash qalasynda zamanaýi úlgidegi avtokólik bólshekterin saýdalaýǵa arnalǵan «TOLEGEN ATA» avtomarketi ashyldy, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Saýda ortalyǵynyń ashylý saltanatyna aýdan ákimi Muhit Otarshiev arnaiy qatysyp, turǵyndardy quttyqtady.
«Búgin aýdanymyzda zamanaýi úlgidegi avtokólik bólshekterin saýdalaýǵa arnalǵan saýda ortalyǵy ashylyp otyr. Jyl saiyn aýdan kásipkerleri óz kásibin ashyp, kóp jumys atqarýda. Sondyqtan biz osyndai azamattardy qoldaýymyz kerek. Aldaǵy ýaqytta atalǵan nysan 400-ge jýyq turǵyndy turaqty jumyspen qamtyp, jumyssyzdyq máselesin sheshýge óz septigin tigizeri sózsiz. Aýdan kásipkeriniń bastaǵan kásibi damyp, jańa ortalyq halyq igiligine qyzmet etedi dep senemiz. Barlyǵyńyzdy jańa nysannyń ashylýymen quttyqtaimyn», – dedi aýdan ákimi.
Saýda ortalyǵy ǵimaratynyń jalpy alańy 5200 sharshy metrdi quraidy. Munda 156 saýda dúńgirshegi ornalasqan, turǵyndarǵa yńǵaily jaǵdailar jasaý maqsatynda jedelsaty (lift) jáne eskalatormen qamtamasyz etilgen.
Aita ketsek, aýdan kóleminde kásipkerlikti qoldaýǵa baǵyttalǵan memlekettik baǵdarlamalardy júzege asyrýǵa turaqty negizde jumystar júrgizilip, jańa jumys oryndaryn ashýǵa, kásipkerlik sýbektileriniń jumys isteýine jaǵdai jasalýda. Búgingi tańda aýdan boiynsha 17410 kásipkerlik sýbektisi jumys isteidi. Osy sýbektilerde jumys isteitin adamdar sany 38500-ge jetip, ótken jyldyń osy merzimimen salystyrǵanda 3,5 %-ǵa ósken. Óndirilgen ónim kólemi jáne kórsetilgen qyzmet pen jumys kólemderi 75 mlrd. teńge bolyp, ótken jylmen salystyrǵanda 3,6 %-ǵa artqan.
