Foto: Qorǵanys ministrligi
Qorǵanys ministrligi jyl basynan beri Qarýly Kúshterde bolǵan ólim jaǵdailaryna bailanysty málimdeme jasap, qaza bolǵandardyń otbasylaryna kóńil aitty, dep habarlaidy Ult.kz.
Ministr Dáýren Qosanovtyń tapsyrmasymen qaiǵyly oqiǵalardy boldyrmaý úshin shuǵyl sharalar qabyldandy:
1. Áskeri tártip pen qaýipsizdik talaptary kúsheitildi; atys jattyǵýlary men sabaqtar kezinde saqtyq qatańdatyldy.
2. Jeke quram psihologiialyq tekserýden ótkizilýde, qyzmettik daiyndyq qaita baǵalandy.
3. Komandirler men serjanttardyń jaýapkershiligi arttyryldy, oqys oqiǵalardyń aldyn alý basty nazarda.
4. Áskeri bólimderde jan-jaqty tekserýler men beinebaqylaý júrgizilýde, quqyq buzýshylyqtarǵa qarsy profilaktikalyq sharalar kúsheitildi.
5. Áskeri qyzmetshilerdiń týystarymen turaqty beinebailanys qamtamasyz etildi.
6. Barlyq oqiǵalar boiynsha kadrlyq jáne tártiptik sharalar qabyldandy: bólim komandirleri men olardyń orynbasarlary qyzmetten bosatyldy, keibir qolbasshylar tártiptik jaýapkershilikke tartyldy.
Ministrlik sharalardyń basty maqsaty – jeke quramnyń ómiri men densaýlyǵyn qorǵaý jáne qaiǵyly jaǵdailardyń qaitalanýyna jol bermeý ekenin aitty.
Aita keteiik, kúni keshe Jambyl oblysynda taǵy bir sarbaz kóz jumdy.
