Foto: ashyq derekkóz
Atyraý oblysyndaǵy «Saraishyq» memlekettik tarihi-mádeni mýzei-qoryǵynyń mamandary biyl ortaǵasyrlyq Saraishyq keshenine qarasty bes qalashyq ornynan 250-ge jýyq jádiger tapty, dep habarlaidy Ult.kz Óńirlik kommýnikatsiialar qyzmetine silteme jasap.
Sonymen qatar XIV ǵasyrdyń alǵashqy kezeńine jatatyn turǵyn úilerdiń, tsitadeldiń jáne kerýensaraidyń bólikteri anyqtaldy. Tabylǵan jádigerler Altyn Orda dáýirine tiesili.
Arheologiialyq zertteýlermen qatar kóne qala aýmaǵynda qaita qalpyna keltirý jumystary da júrgizilýde. Jaiaý júrginshilerge arnalǵan jol salynyp, kelýshilerge qolaily jaǵdai jasalǵan. Qazba oryndary restavratsiialanyp, ejelgi Saraishyqtyń tarihi kelbetin jańǵyrtý jumystary jalǵasýda.
«Saraishyq» memlekettik tarihi-mádeni mýzei-qoryǵynyń bas inspektory, arheolog Aibek Turarulynyń aitýynsha, byltyr Saraishyq aýmaǵynda bes jerde qazba jumystary júrgizilip, 150-den astam jádiger tabylǵan.
– Tabylǵan jádigerler qatarynda metaldan, shynydan jáne súiekten jasalǵan turmystyq ári sándik buiymdar, qysh ydystar bar. Sonyń ishinde eń erekshe jádiger – XIV–XV ǵasyrlarǵa tiesili, Altyn Orda qalashyqtarynda buryn kezdespegen qoladan jasalǵan qulyp, – dedi Aibek Turaruly.
Qazir bul aýmaq tolyq tsifrlandyrylýda. Ár qazba ornynyń aldyna QR-kodtar ornatylǵan. Týrister mobildi telefon arqyly kodty skanerlep, tarihi nysandar týraly tolyq aqparat ala alady. Sonymen qatar Saraishyqta Qasym hanǵa arnalǵan eskertkish salý josparlanyp otyr.
Tarihi orynǵa keletin týrister sany jyldan-jylǵa artyp keledi. Máselen, eki jyl buryn munda 18 myń adam kelse, byltyr olardyń sany 28 myńǵa jetken.
