Prezidenttik jastar kadr rezervine irikteý onlain ótken kezde eshkim eshkimge áser etken joq. Bul týraly Ortalyq kommýnikatsiialar qyzmetinde jýrnalistermen bolǵan brifingte QR Memlekettik qyzmet isteri agenttiginiń tóraǵasy Anar Jailǵanova aitty, dep habarlaidy QazAqparat.
«Irikteýdiń ashyqtyǵyna keletin bolsaq, ony birinshi kezeńnen bastap onlain formatta ótkizdik. Ol degenimiz - barlyq test onlain formatta ótedi degen sóz, iaǵni oǵan eshkim eshqandai áser ete almaidy», - deidi Anar Jaiylǵanova.
Ol iriktelgen 300 adamnyń ishinde kvazimemlekettik sektordyń jaýapty laýazymdaryna rezervshilerden bólek memlekettik qyzmetkerler de kirgenin aitty.
«Al iriktelgenderdiń ishinde ne sebepti memlekettik qyzmetshiler bolǵany týraly aityp ótsek, bizdiń qoiǵan talaptar qarapaiym boldy. Ol 35 jasqa deiingi, joǵary bilimi bar QR azamaty bolýy kerek. Sondai-aq, kem degende 5 jyl jumys ótili bolýy qajet. Sondyqtan osy talapqa sai bolǵan qatysqysy keletin adamdardyń bári qatysty. Konstitýtsiiamyz boiynsha basqa talaptar boiynsha qatystyrmai qoiyp, quqyǵyn shekteýge quqymyz joq. Odan keiingi esse jazý, jobalardy kórsetý siiaqty kezeńder de onlain formatta ótti. Sarapshylardyń ózderi de kimge baǵa qoiyp otyrǵandaryn bilgen joq, sebebi qatysýshydardyń aty-jónderi kodpen turdy. Bir jobany qaraǵan úsh sarapshy da birin-biri tanymaidy jáne esse men jobaǵa óz baǵalaryn berip otyrdy. Onyń nátijesi birden bazaǵa ketip otyrdy, bazaǵa ketken esepte eshkim ózgerte almaidy», - deidi ol.
Eske sala ketsek, Prezidenttik jastar kadr reshervine irikteý biyl qyrkúiek aiynda bastaldy.
