«QazAvtoÓnerkásip» ZTB basqarma tóraǵasynyń orynbasary Artýr Miskarian eshqaida tirkelmegen reseilik nómirmen júrgen avtokólikterge qatysty pikir bildirdi, dep habarlaidy QazAqparat.
Aita keteiik, Resei nómiri bar, biraq sol elde tirkeýde joq 88 myń kólik Qazaqstan aýmaǵynda júrgeni belgili boldy.
«QR Ishki ister ministrliginiń reseilik áriptesterimen birlese júrgizgen tekseris Qazaqstanyń joldarynda Reseidiń esebinde tirkelmegen 88 myń avtokólik júrgenin kórsetti. Bul óz kezeginde atalǵan kólikter eshqaida tirkeýde turmaǵynan bildiredi. Olarǵa qatysty kólik salyǵy Reseide de, Qazaqstanda da tólenbeidi», - dep jazdy A. Miskarian Telegram kanalynda.
Osy oraida ol atalǵan 88 myń avtólikke toqtala kele, tiisti salystyrmaly kórsetkishterdi atap ótti.
«2020 jyly Qazaqstan aýmaǵynda 64 790 jeńil kólik qurastyryldy. Al Toyota-nyń resmi dilerleri 10 myń jańa kólikti satty. Sol kezeńde LADA 17,5 myń, Hyundai 18 myń kólik ótkizdi. Elimizde tirkelgen avtokólikterdiń parki 3,84 mln-ǵa jetken, sáikesinshe 88 myń kólik barsha avtoparktiń 2,5 paiyzy. 2020 jyldyń qorytyndysy boiynsha Qazaqstandaǵy jańa kólikterdiń barsha naryǵy (import pen jergilikti qurastyrýdy qosqanda) 90 myń bolǵan», - dedi ol.
«88 myń (reseilik nómirdegi) kóliktiń arasynda «kriminaldy» avtomobilder de bar. QR IIM Ákimshilik politsiia komiteti tóraǵasynyń orynbasary Serik Túsipovtiń sózine qaraǵanda, RF Ishki ister ministrligi tarapynan izdeýde júrgen 606 kólik anyqtaldy. Osyndai 200-den astam kólik tabylyp, aiyp turaǵyna qoiyldy. Atap aitqanda, 2019 jyldyń maýsym aiynda «QazAvtoÓnerkásip» memorgandar men qoǵamnyń nazaryn osy problemaǵa aýdaryp, birneshe is-sharalardy usynǵan edik. Osy oraida ýaqytsha kirgizý rásimderi men ákelingen avtokólikterge qoiylatyn talaptardy túsindirý, olardy ákimshilendirý júiesin retke keltirý, sondai-aq sol kezeńde kirgizilgenderge memlekettik tirkeý jasap, tehreglament pen qaýipsizdik talabyna sáikes kelmeitinderge qatysty shara qabyldaý usynylǵan edi», - dedi Artýr Miskarian.
