Májilis depýtattary Ákimshilik quqyq buzýshylyq týraly kodeksine bailanys máseleleri boiynsha ózgerister men tolyqtyrýlar engizýdi kózdeitin zań jobasyn jumysqa aldy. Qujatta sapasyz internet úshin bailanys operatorlaryna aiyppul salý sharasy qarastyrylǵan, dep habarlaidy Sputnik Qazaqstan.
Zańnama jáne sot-quqyqtyq reforma komitetiniń tóraǵasy Arman Qojahmetovtyń aitýynsha, zań jobasy memleket basshysynyń tapsyrmasy aiasynda depýtattar tobymen ázirlendi. Negizgi maqsat – internetti barynsha qoljetimdi etý jáne sapaly bailanysty jasaý. Osyǵan bailanysty bailanys operatorlarynyń jaýapkershiligi aiyppuldy arttyrý arqyly kúsheitiledi.
"Zań jobasymen Ákimshilik quqyq buzýshylyq týraly kodekstiń 637-babynyń birinshi bóliginde iri kásipkerlik sýbektiler úshin zańnamada belgilengen tehnikalyq parametrlerge sáikes kelmeitin bailanys jáne internetke qol jetkizý qyzmetteri úshin aiyppul mólsherin ulǵaitý arqyly bailanys operatorlarynyń jaýapkershiligin kúsheitýge múmkindik beredi. Zań jobasy halyqtyń sapaly bailanys pen internet alý quqyǵyn qorǵaýdy kózdeidi", - dedi Qojahmetov májilistiń jalpy otyrysynda.
Aita keteri, buǵan deiin tsifrlyq damý, innovatsiialar jáne aeroǵarysh ónerkásibi ministri Baǵdat Mýsin internet sapasyna qatysty eń tómengi paramentrlerdiń bekitilgenin aitqan. 3G úshin 1,5 Megabit, al 4G úshin keminde 5 Megabit bolýy shart. Biyl 400-den astam tekserý jasaldy. Sonyń 80 protsentinde internettiń eń tómengi parametrlerin buzý faktileri anyqtaldy. Sol úshin uialy bailanys operatorlaryna aiyppul salyndy. Úsh-tórt aidyń ishinde internettiń sapasy kóterilmese, aiyppuldyń kólemi eki esege artady.
Al jańa zań jobasynda aiyppuldyń kólemin on esege arttyrý qarastyrylǵan. Buryn 100 AEK bolsa, aldaǵy ýaqytta 1 000 AEK bolady.
"Bul degenimiz, biyl biz 400 tekserýdiń nátijesinde 92 million teńgeniń aiyppulyn salsaq, on esege ósirgennen keiin bir jylda 1-2 milliard teńgeniń aiyppuly salynady. Bul – óte qomaqty soma. Sondyqtan operatorlar internet sapasyna kóńil bóledi degen senim bar", - deidi Mýsin.
