QR Premer-Ministriniń orynbasary Berdibek Saparbaev QR Prezidenti janyndaǵy Ulttyq qoǵamdyq senim keńesiniń áleýmettik-mádeni jańǵyrý máseleleri jónindegi jumys tobynyń múshelerimen kezdesti, dep habarlaidy "Ult aqparat".
Kezdesýge Májilis depýtaty J. Ahmetbekov, qoǵam qairatkeri M. Ábenov, rejisser E. Tursynov, saiasatker S. Nurbek, «Team Qazagstan» jastar qozǵalysynyń kóshbasshysy A. Sadyrbai, «Qazaq úni» JShS prezidenti Q. Isa jáne jumys tobynyń basqa da músheleri qatysty.
Sonymen qatar, talqylaýǵa Úkimettiń áleýmettik blok ministrlikteriniń basshylary – QR eńbek jáne halyqty áleýmettik qorǵaý ministri B. Nurymbetov, QR mádeniet jáne sport ministri A. Raiymqulova, QR bilim jáne ǵylym ministri A. Aimaǵambetov, QR aqparat jáne qoǵamdyq damý ministri D. Abaev, QR densaýlyq saqtaý vitse-ministri L. Aqtaeva qatysty.
«Ózderińiz bilesizder, Memleket basshysy qurǵan Ulttyq qoǵamdyq senim keńesi qoǵam men bilik arasyndaǵy senimdi nyǵaitýdyń berik kópiri bolyp sanalady. Búginde bul – birlesken sheshimder qabyldaýǵa, damýdyń ózekti joldaryn izdestirýge baǵyttalǵan jańa kommýnikatsiialyq alań. Biz áleýmettik-mádeni jańǵyrtýdyń odan ári mańyzdy aspektilerin talqylaýǵa jinaldyq», — dedi B. Saparbaev óz sózinde.
Vitse-premer áleýmettik-mádeni saladaǵy Ulttyq keńes músheleriniń usynystaryn qaraý qorytyndysy týraly jumys tobynyń múshelerine aqparat berdi. Sonyń ishinde, memlekettik organdar Mádeniet jáne sport ministrligi janynan mádeni saiasat jónindegi keńesti qurý; daryndy balalardy qoldaý jáne alǵa tartý; mádeni týrizmniń jańa oryndaryn qurý; pedagog mártebesin arttyrý jáne basqa da usynystardy qoldady.
Óz kezeginde Ulttyq keńes músheleri bilim berý men densaýlyq saqtaý sapasyn arttyrý, mádeniet pen sporttyń tanymaldylyǵyn arttyrý, JOO-lar túlekterin eńbekke ornalastyrý, memlekettik til mártebesin kóterý, jastarǵa rýhani-adamgershilik tárbie berý problemalaryn sheshý, dári-dármektermen qamtamasyz etý, tarihi otanyna oralǵan qandastarǵa qoldaý kórsetý boiynsha birqatar usynystar bildirdi.
Kezdesý barysynda Úkimet pen Ulttyq keńes músheleri áleýmettik-mádeni salany jańǵyrtý, ótkir áleýmettik problemalardy sheshý boiynsha ózekti máselelerdi talqylady.
Kezdesýdiń sońynda Berdibek Saparbaev Ulttyq qoǵamdyq senim keńesiniń múshelerine mazmundy dialog órbigeni úshin alǵys bildirdi.
«Búgin syndarly ári ashyq áńgime boldy dep oilaimyn, azamattarymyzdy tolǵandyratyn ózekti máseleler qaraldy. Sizderdiń barlyq usynystaryńyzdy memlekettik organdar eskeretin bolady. Memleket basshysy alǵa qoiǵan mindetterdi iske asyrý men áleýmettik máselelerdi sheshý boiynsha aldaǵy ýaqytta da jemisti ózara yntymaqtastyǵymyzdy jalǵastyratynymyzǵa senim bildiremiz», — dep túiindedi B. Saparbaev.
