Taraz qalasyndaǵy Mars Úrkimbaev atyndaǵy Jastar saraiynda jetim balalar men ata-anasynyń qamqorlyǵynsyz qalǵan balalardy áleýmettik qoldaý boiynsha «Meiirim» jobasynyń tusaýkeseri ótti, dep habarlaidy "Ult aqparat".
Oblysta 18 jasqa deiingi barlyǵy 433 myń bala turady. Onyń ishinde 1352 bala jetim jáne ata-anasynyń qamqorlyǵynsyz qalǵan balalar. Osy áleýmettik sanatqa jatatyn 113 bala oblystyń memlekettik mekemelerinde tárbielenýde.
Jobanyń tusaýkeserine kelgen qonaqtar aldymen Jastar saraiynyń foesinde ázirlengen ómirlik qiyn jaǵdaidaǵy balalardy qoldaý jónindegi oblystyq ortalyqtyń balalaryna arnalǵan sýretter men qolóner buiymdarynyń kórmesimen tanysty.
«Bizde barlyǵy 70 bala bar, olardyń 49-y osy «Meiirim» jobasyna endi, al búgin kómekke muqtaj alty bala sharaǵa qatysýda», - deidi ómirlik qiyn jaǵdaidaǵy balalardy qoldaý ortalyǵynyń direktory Aijan Meiirhanova.
«Meiirim» jobasynyń tujyrymdamasyna sáikes 134 jetim bala oblystyń 87 memlekettik mekemesi men iri kásiporyndarynyń basshylaryna bekitilgen. Memlekettik organdar men biznes qurylymdardyń basshylary bul balalardy odan ári áleýmettik qamtamasyz etý úshin barlyq jaǵdai jasaityn bolady. Atap aitqanda, olar balalardyń turǵyn úi jinaq shottaryn kezeń-kezeńimen tolyqtyrýdy uiymdastyrady jáne jan-jaqty qoldaý kórsetedi. Demeýshiler balalardy turaqty jumyspen jáne turǵyn úimen qamtamasyz etý máselelerin sheshedi.
«Búgingi kúnge deiin áleýmettik beiimdeý, bilim berý jáne jumyspen qamtý, otbasyn qurý, jetim balalar men ata-anasynyń qamqorlyǵynsyz qalǵan balalardy, arnaiy mekemelerdiń túlekterin turǵyn úimen qamtamasyz etý sharalary ózekti bolyp qalyp otyr», - dedi tanystyrylym barysynda oblys ákimi Berdibek Saparbaev.
Bul aýqymdy jobanyń maqsaty – áleýmettik jáne quqyqtyq kepildikterdi qamtamasyz etý arqyly jetim balalar men ata-anasynyń qamqorlyǵynsyz qalǵan balalardyń ómir súrý sapasyn jaqsartý. Tarihqa zer salsaq, Uly Dalada eshqashan jetimder bolǵan emes, alaida, ujymdastyrý, jappai qýǵyn-súrgin jáne halyqtardyń Qazaqstanǵa jer aýdarylý, soǵys kezeńindegi qiyndyqtar jetimdik jaǵdailaryn týdyrdy. Al búgingidei tynysh ári beibit, toqshylyq kezde biz balalarymyzdyń eshqaisysyna jetimdik taýqymetin tartqyzbaýǵa tisipiz, barshamyz birge olarǵa qamqorlyq tantýymyz kerek. Jobanyń bastamashysy retinde oblys ákimi Berdibek Saparbaev ómirlik qiyn jaǵdaiǵa tap bolǵan balalardy qoldaý ortalyǵynyń tárbielenýshisi, 6-synyp oqýshysy Albina Qadyrovaǵa ómirlik qoldaý jónindegi áleýmettik kelisimshartqa birinshi bolyp qol qoidy. Basqa balalar boiynsha osyndai kelisimderge iri kásiporyndardyń basshylary men aimaqtaǵy bedeldi tulǵalar da qol qoidy. Olardyń qatarynda «Qazfosfat» JShS bas direktory Muqash Eskendirov, «Altais Grýpp» JShS direktory Álimbek Jumabaev, «Araistroimarket-2003» JShS direktory Arman Edilbaev, «Gaýgartas» meiramhanasynyń direktory Merýert Leshtaeva jáne taǵy basqalary bar.
Osy kelisimder aiasynda bes balaǵa million teńgelik sertifikattar tabystaldy. Bul aqsha olardyń «Turǵyn úi qurylys jinaq banki» AQ-yndaǵy turǵyn úi jáne jinaq shottaryna túsedi. 18 jasqa tolǵannan keiin ortalyq tárbielenýshileri olardy jeke turǵyn úi satyp alý úshin paidalana alady. Oǵan deiin olardyń qamqorshylary múmkindiginshe osy shotty toltyryp otyrady.
