Fýtboldan elimizdiń chempionaty qarsańynda oblys ákimi Berdibek Saparbaev «Taraz» FK jattyqtyrýshylary jáne oiynshylarymen kezdesti. Kezdesýde tek aǵymdaǵy maýsymnyń mindetteri ǵana emes, jalpy aimaq fýtbolyn damytý strategiiasy týraly da jan-jaqty saralandy, dep habarlaidy "Ult aqparat".
Berdibek Saparbaev oiynshylarmen júzdesýde Jambyl fýtbolyn damytýdyń egjei-tegjeili baǵdarlamasyn usynyp, ol boiynsha oblys basshylyǵynyń aldaǵy jyldarǵa arnalǵan strategiiasy týraly keńinen áńgimeledi. Máseleniń ózegine úńilgen oblys ákimi óz tárbielenýshilerin
daiarlaýdyń naqty baǵytyn anyqtap berdi. «Taraz» komandasynyń negizi balalar men jasóspirimder fýtboly bolyp tabylady. Osy oraida, naǵyz talanttardy aýyldardan izdeýge basa nazar aýdarǵan abzal. Taǵy bir baǵyt – buqaralyq sportty damytý desek, bul daryndy fýtbolshylardy tabýda óziniń oń yqpalyn tigizetini daýsyz. Ótken jyldyń ózinde oblystyq biliktiń kúshimen 14 jabyq dene shynyqtyrý-saýyqtyrý kesheni men 92 fýtbol alańshasy salyndy. Nátijesinde sportpen shuǵyldanatyn jambyldyqtardyń úlesi 30 paiyzdan 35-ke artty, bul respýblikalyq ortasha kórsetkishten edáýir joǵary.
«Biz balalardy oqytýmen qatar fýtboldyń qyr-syryna baýlityn mektep-internatyn ashýdy josparlap otyrmyz. Sonymen qatar, balalarmen jumys isteitin joǵary bilikti jattyqtyrýshylardy tartyp, akademiia qurý qajettigine nazar aýdarýdamyz. Sondai-aq, túrli týrnirlerge qatystyra otyryp, barlyq jastaǵy komandalardy ózara tájiribelerimen almastyryp otyrý da asa mańyzdy. Biz uzaq jyldar boiy úilesimdi jumys isteitin júieni qalyptastyryp, ózara sabaqtastyqty qamtamasyz etýimiz kerek», - dedi Berdibek Saparbaev.
Aldyńǵy basshylyq ózine júktelgen mindetti eńsere almady, endigi ol mindet klýb basshysy Talǵat Turlybaiuly bastaǵan sport fýnktsionerlerine júktelip otyr.
Búgingi tańda komandada da, jattyqtyrýshylar quramynda da úlken ózgerister oryn alǵan. Komandany ÝEFA PRO bapkerlik litsenziiasyna ie jáne Armeniianyń ulttyq quramasymen nátijeli tabystarǵa qol jetkizgen Vardan Minasian basqarmaq. Bapkerler quramyna jergilikti mamandar Sergei Tagiev, Aleksandr Kýchma, Arslan Satýbaldin jáne Samat Naýryzbaev engen.
Kezdesýde sóz alǵan Vardan Minasian komanda quramy 60-70 paiyzǵa jańarǵanyn tilge tiek etti. «Basqa da oinaýǵa turarlyq talantty jastar kóp. Biraq ýaqyt tapshy, sondyqtan resmi matchtarda tájiribe jinaqtaýǵa týra keledi», - dedi ol.
Iia, búginde komandada jas oiynshylar kóp. Dálirek aitsaq, chempionatqa qatysatyn 25 fýtbolshynyń 18-i Jambyl fýtbolynyń tárbielenýshileri.
Maýsym aralyq úzilis kezinde komanda Taraz, Shymkent qalalarynda jáne Túrkiia elinde birneshe oqý-jattyǵý jiyndaryn ótkizdi.
Mindetterge keletin bolsaq, «Taraz» barynsha tyrysyp, kem degende altynshy orynǵa ie bolýy tiis. Sonymen qatar, Qazaqstan kýbogi úshin talasý mindeti de qoiylyp otyr.
Kezdesý sońynda oblys ákimi Berdibek Saparbaev komandaǵa jańa jaily avtobýs satyp alynatynyn aityp, oblys basshylyǵy óz alańymyzda ótetin barlyq matchtarǵa qatysyp, komandany qoldaitynyna ýáde berdi.
