Jambyl oblysynyń ákimi Berdibek Saparbaev Sarysý aýdany Jańatas qalasynda bes balanyń ólimine sebep bolǵan órt oqiǵasy týraly jazdy, - dep habarlaidy "Ult aqparat".
Qaiǵyly oqiǵa jóninde aimaq basshysy Instagram jáne Facebook áleýmettik jelisindegi jeke paraqshasynda jazba jaiialady. Jazbada oblys ákimi aýyr jaǵdaiǵa qabyrǵasynyń qaiysqandyǵyn, marqumdardyń jaqyndaryna kóńil aitatyndyǵyn jetkizgen.
Sondai-aq, B. Saparbaev máseleni jeke baqylaýyna alǵandyǵyn jáne oqiǵanyń mán-jaiy zerdelenýde ekendigin málim etti.
«Búgin búkil eldi eseńgiretken qaiǵyly oqiǵa boldy. Jańatastaǵy úilerdiń birinen órt shyǵyp, bes birdei beikúná bala ajal qushty. Oqiǵanyń mán-jaiyn anyqtaý úshin oblys ákiminiń orynbasary Ulan Jazylbektiń tóraǵalyǵymen arnaiy komissiia quryldy. Oqiǵa ornyna oblys prokýrory N.Ábdirov, Politsiia departamentiniń basshysy J. Súleimenov, TJD basshysy E. Mombaev attandy.
Qara jamylǵan otbasyǵa qajetti psihologiialyq, materialdyq kómek kórsetilýde. Másele - meniń jeke baqylaýymda. Kóz jumǵan balalardyń jaqyndaryna Alla Taǵala sabyr bersin. Qaiǵylaryna ortaqtasyp kóńil aitamyn!», - delingen ákimniń jazbasynda.
Osyǵan deiin Jambyl oblysy Sarysý aýdany Jańatas qalasyndaǵy 2 yqshamaýdandaǵy 5 qabatty turǵyn úidegi órtten 5 balanyń qaza bolǵany jazyldy.
