Sankt-Peterbýrg memlekettik orman-tehnikalyq ýniversitetiniń Ǵylymi keńesi bas ǵimaratyna Alash kósemi Əlihan Bókeihanovqa estelik taqta ornatylatyn boldy.
Bul usynysty, iaǵni eskertkish taqta ornatýdy «Aq jol» Demokratiialyq partiiasynyń tóraǵasy, Májilis depýtaty Azat Perýashev bastaǵan parlamenttik fraktsiia usynyp, atalmysh Ýniversitettiń rektoryna arnaiy hat joldaǵan bolatyn. Nátijesinde osyndai sátti de, qýanyshty sheshim qabyldandy.
Odan bólek partiia ult kóseminiń qiian-keski kúreske toly ǵumyrynyń aqyrǵy 15 jylyn ótkizgen Máskeýdegi B. Kislovskii oramy, 4 úii men Samara qalasyndaǵy 1909-1917 jyldary turǵan Kazanskaia kóshesi, 32 úiine de estelik taqta ornatý isin de qolǵa alyp otyr.
«Aq jol» QDP baspasóz qyzmetiniń habarlaýynsha, Jýyrda bul igilikti iske bailanysty Azat Perýashev Qazaqstannyń Reseidegi Elshisi Imanǵali Tasmaǵambetovke arnaiy hat joldady.
«Aq joldyń» osyndai júieli usynystary men naqty isteriniń arqasynda búgin tańerteń Sankt-Peterbordan qýanyshty habar kelip jetti. Alash kósemi Álihan Bókeihannyń 1890-1894 jyldary oqyp bitirgen burynǵy Imperatorlyq Orman institýty, qazirgi Sankt-Peterbor memlekettik orman-tehnikalyq ýniversitetiniń Ǵylymi keńesi bas ǵimaratynyń mańdaishasyna óziniń dańqty túlegi, 2015 jyly IýNESKO «Búkil álemdik shynaiy dańqty qairatker» dep jariialaǵan Álihan Bókeihan týraly estelik taqta ornatý týraly partiianyń usynysyn basym daýyspen qoldap (27 daýys qoldady, 7 daýys qarsy, 5 daýys qalys qaldy), igilikti sheshim qabyldady.
Osy oraida Qazaqstan Respýblikasynyń Sankt-Peterbýrg qalasyndaǵy Bas Konsýly Bolat Imanbaevpen bailanysqa shyǵyp, bul jóninde aqparat alǵan edik.
Bas konsýl: «Daýys berý kezinde partiianyń joldaǵan usynysy basymdyqpen qoldaý tapty. Endi bul másele Sankt-Peterbýrg Úkimetiniń tarihi eskertkishterdi qorǵaý jónindegi Komissiiasynda qaralatyn bolady. Sondai-aq, Alash arysyn este qaldyrý tek munymen bitpeidi. Aldaǵy ýaqytta Sankt-Peterbor memlekettik Orman-tehnikalyq ýniversitetinde oqityn úzdik qazaqstandyq stýdentterge Álihan Bókeihan atyndaǵy stipendiia taǵaiyndaý týraly másele qaralyp jatyr», - dep jaǵymdy jańalyǵyn habarlady.
Sonymen qatar, bul istiń júzege asyrylýyna úilestirýshi retinde atsalysqan alashtanýshy ǵalym Sultan Han Aqquly men sol institýttyń túlegi Maiken Ázenovtiń eńbegin de atap ótken jón.
Sanaly ǵumyryn ulttyq memlekettiń irgetasyn kóterýge sarp etken Alash kósemi Álihan Bókeihan esimi árqashanda ardaqtaýǵa laiyqty.
