Sanaqqa qatysýdan bas tartyp, ózi týraly málimet bermegen azamattaǵa qarsy shara qoldanyla ma? Ortalyq kommýnikatsiialar qyzmetinde ótken brifingide Ulttyq statistika biýrosynyń basshysy Nurbolat Aidapkelovke osyndai suraq qoiyldy, dep habarlaidy QazAqparat.
«Jalpyulttyq sanaq kezinde interviýerlerdiń anketa boiynsha qoiylǵan suraqtaryna jaýap berýden bas tartqandarǵa zańnamada norma qarastyrylǵan. Bul norma barsha statistikalyq aqparattardy usyný máselesin qozǵaidy. Onyń ishinde halyq sanaǵy da bar. Biraq bul norma sanaq kezinde ózi týraly málimet usynýdan bas tartqan adamdarǵa qarsy eshqashan qoldanylyp kórgen joq. Biz barynsha úgit-nasihat júrgizip, pikirin ózgertý baǵytynda jumysqa kúsh salamyz. Azamattarymyzdyń da bul iske sanaly túrde qaraitynyna úmittenemiz. Sondyqtan, bul norma erteń qoldanylyp, bas tartqandardyń bárine aippul salamyz desek, shyndyqqa janaspaidy», - dedi biýro basshysy.
Atalmysh sharada Nurbolat Aidapkelov sanaq qorytyndysyn kimder kóre alatyny aitqan bolatyn.
«Birinshiden, biz sanaq qorytyndysy boiynsha bazany óńdegennen keiin ony arnaiy kesteler boiynsha internettegi saitymyzǵa salamyz. Biraq bazaǵa naqty talap boiynsha kirýge bolady. Basty talap – sanaq qorytyndysymen tanysqysy kelgen adam ǵylymmen ainalysatynyn dáleldeýi kerek. Sonymen birge IR-servis arqyly bizdiń júiege kirý múmkindigi bolýy kerek. Sol talaptardy saqtasa, deedintifikatsiialyq mazmundaǵy bazaǵa kirýine bolady», - dedi vedomstvo basshysy.
