Foto: Aqordanyń resmi saity
Qasym-Jomart Toqaev "Samuryq-Qazyna" AQ basqarma tóraǵasy Nurlan Jaqypovty qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysyna Qordyń biylǵy 8 aida atqarǵan jumysynyń qorytyndysy jóninde baiandaldy.
Prezidentke "Samuryq-Qazyna" AQ kompaniialar tobynyń óndiristik jáne qarjylyq kórsetkishteri, sondai-aq jyl qorytyndysy boiynsha kútiletin nátijeleri tanystyryldy.
Sonymen qatar, Qorǵa qarasty kompaniialar tobynyń mańyzdy jobalaryn júzege asyrý barysy jóninde málimet berildi. Máselen, jyl sońyna deiin alty iri jobany, atap aitqanda Astrahan – Mańǵyshlaq sý qubyryn rekonstrýktsiialaý, "Sarsha" jáne "Jyly jaǵajai" eldi mekenderine gaz qubyryn tartý, Beineý – Jańaózen gaz qubyrynyń 2-shi jelisin jáne Maqat – Soltústik Kavkaz gaz qubyrynyń lýpingin salý, birinshi GRES-tiń 1-shi blogyn qalpyna keltirý, Qazaqstan Respýblikasynyń Biryńǵai elektrenergetikalyq júiesine qarasty batys aimaǵyndaǵy elektr jelilerin kúsheitý jobalaryn aiaqtaý josparlanyp otyr.
Budan bólek, Memleket basshysyna Qor aktivterin jekeshelendirý josparynyń iske asyrylý barysy jóninde málimet berildi. Biyl 10 qarashaǵa deiin KEGOC kompaniiasynyń SPO-syn aiaqtaý josparlanyp otyr.
Kezdesý sońynda Qasym-Jomart Toqaev investitsiialyq jobalardy júzege asyrý, sondai-aq "Samuryq-Qazyna" qoryna qarasty beiindi emes aktivterdi jekeshelendirý jáne kompaniialarǵa halyqtyq IPO ótkizý jóninde birqatar naqty tapsyrma berdi.
