Samal Esliamova «Qazaqstannyń eńbek sińirgen qairatkeri» atandy

Elbasy Nursultan Nazarbaev aktrisa Samal Esliamovaǵa «Qazaqstannyń eńbek sińirgen qairatkeri» ataǵyn tabystady, dep habarlaidy "Ult aqparat".

Búgin Aqordada elimizdiń ósip-órkendeýine zor úles qosqan birqatar azamatty memlekettik nagradamen marapattaǵan Memleket basshysy «Qazaqstannyń eńbek sińirgen qairatkeri» ataǵyn aktrisa Samal Esliamovaǵa, «Qurmanǵazy atyndaǵy Qazaq ulttyq konservatoriiasy» RMM aǵa oqytýshysy Ian Rýdkovskiiǵa berdi.

Sonymen qatar III dárejeli «Eńbek Dańqy» ordeni "Kazakhmys Smelting" JShS Balqash mys qorytý zaýytynyń qorytýshysy Temirjan Bekjanov aldy. Al  II dárejeli «Dańq» ordenimen Ulttyq qaýipsizdik komiteti Soltústik Qazaqstan oblystyq departamentiniń bastyǵy Asqar Aqshaev, Qorǵanys ministriniń orynbasary Músilim Altynbaev, Almaty qalasynyń prokýrory Berik Júiriktaev, QR Qarýly kúshteri Áýe qorǵanys kúshteri Áskeri-áýe kúshteriniń qolbasshysy Dáýren Qosanov marapattaldy.

II dárejeli «Aibyn» ordenine IIM Astana qalalyq politsiia departamenti Jol-patýrldik politsiiasy polki qyzmetiniń inspektory Azamat Baltabaev, III dárejeli «Aibyn» ordenine IIM Qyzylorda oblystyq tótenshe jaǵdailar departamenti Órt sóndirý jáne avariialyq-qutqarý jumystary qyzmetiniń Qyzylorda qalalyq № 2 mamandandyrylǵan órt sóndirý bóliminiń bólimshe komandiri Ermekbek Pazliev jáne «Jaýyngerlik erligi úshin» medaline Memlekettik kúzet qyzmeti Obektilerdi qorǵaý qyzmeti «Aibyn» Prezidenttik polki»  Áskeri bóliminiń rásimdik batalony qurmet qaraýyl rotasynyń bólimshe komandiri Ádilhan Tórebekov ie boldy.