«MýzArt» tobynyń beldi múshesi, ánshi Sáken Maiǵaziev basshylyq qyzmetke keldi.
Ánshi Temirbek Júrgenov atyndaǵy óner akademiiasynyń prorektory bolyp taǵaiyndaldy. Bul týraly ánshi Meirambek Besbaev Instagram jelisindegi paraqshasynda habarlady.
«T.Júrgenov atyndaǵy óner akademiiasynyń prorektory Sáken Maiǵaziev. Durys boldy. Sákenniń qolynan keletin is. Abyroiyń arta bersin», – dep jazdy Meirambek ánshi.
«Búgin bizdiń akademiianyń oqytýshylyq-professorlyq quramyna jańa prorektorymdy tanystyrdym. T.Júrgenov atyndaǵy Qazaq Ulttyq óner akademiiasynyń shyǵarmashylyq jumystar jáne xalyqaralyq bailanystar jónindegi prorektory bolyp Qazaqstannyń eńbek sińirgen qairatkeri Sáken Maiǵaziev taǵaiyndaldy. Elimizdiń mádeni keńistiginde óz orny, óz joly bar tulǵa, kásibi óner sheberi retinde Sáken Qordabaiuly jańa qyzmette abyroi biiginen kórinip, ǵylymi-shyǵarmashylyq salada san asýlardy baǵyndyratynyna senemin! Bizdiń memleketimizde qarapaiym azamattarǵa talant, kásibilik, sheberlik, eńbekqorlyq, tynbai izdenistiń arqasynda biik belesterdi baǵyndyrýǵa bolatynyna Sáken Maiǵazievtiń ómir men óner joly — jarqyn úlgi. Úlken otbasynyń toǵyzynshy perzenti óner álemindegi barlyq asýlardy óziniń maqsatshyldyǵy men eńbekqorlyǵy arqyly baǵyndyrdy. Bilim alý jolynda — kolledj, akademiiada bakalavr, magistratýra, doktorantýra sekildi baspaldaqtardan ótti. Sonaý toqsanynshy jyldardyń ortasynda «Móldir monshaqtar» dep án áýeletken ónerge ǵashyq, móldirlik pen tazalyqqa jany ińkár jas talant Sáken men Qazaqstannyń aitýly qairatker azamaty Sáken Maiǵazievtiń arasynda jiyrma jyldan astam ýaqyt tógilgen mańdai ter, tynymsyz jumys, izdenis, kásibi sheberliktiń izi jatyr. Ákeniń amanatyna adal ul, Ananyń aiaýly perzenti retinde Sáken Qordabaiuly — tek bir áýlettiń ǵana emes, el maqtanyshyna ainalǵan azamat! Ózi de ónegeli otbasynyń iesi. Sáken — árqashan da mártebeń ústem bolsyn!», – dedi Óner akademiiasynyń jańa rektory Ashat Maemirov feisbýk paraqshasynda.
