Elordadaǵy Eýraziialyq integratsiia institýtynda «Ulttyq qoǵamdyq senim keńesi: taldamalyq zerdeleý» saraptamalyq baiandamasy tanystyryldy, dep habarlaidy QazAqparat tilshisi.
Baiandamanyń tanystyrylýyna Ulttyq qoǵamdyq seniń keńesiniń músheleri Talǵat Qaliev, Azamathan Ámirtai, Murat Ábenov, sonymen qatar QSZI ókilderi Madina Nurǵalieva, Alýa Joldybalina qatysýda.
«Bizdiń elimizde, qoǵamda demokratiiaǵa degen suranys arta tústi. Ózderińiz biletindei, keiingi eki jyldyń ishinde pikirler pliýralizmi men kózqarastardyń ár alýandyǵynda úlken ózgeris bar. Osy serpiliske jaýap retinde ótken jyldyń qyrkúieginde Ulttyq qoǵamdyq senim keńesi qurylǵan bolatyn. Ulttyq keńes jarty jyldyń ishinde qandai jumys atqardy? Onyń jumysy qoǵamǵa qandai serpin berdi? Sonymen qatar halyqaralyq dárejede Qazaqstandaǵy demokratiia máselesi nemese erkindik, bostandyq indeksine qandai jaqsy áser bergeni jóninde biraz saraptama jumystary kerek», - dedi Erlan Sairov.
Onyń aitýynsha jarty jyldyń ishinde Ulttyq keńes qoǵamdy eleń etkizgen jumystardy júrgizgen.
«Halyqaralyq dárejede EYUQ men BUU, AQSh-tyń Memlekettik departamenti Ulttyq keńestiń qurylýyna oń baǵasyn berdi. Sonymen birge jeltoqsandaǵy ekinshi otyrysta elimizdi demokratiialandyrýdyń birinshi paketi usynylǵan bolatyn. Mine, osy máseleniń bári qoǵam ishinde qalai talqylanyp jatyr? Qoǵam qalai qabyldaýda? Osy suraqtarǵa jaýap berý kerek. Jaýap bererde saiasattaný turǵysynan belgili bir zertteýler júrgizildi. Bizdiń búgingi qujat – áleýmettik jáne saiasi zertteýlerdiń nátijesi», - dedi ol.
Erlan Sairov búgingi otyrysta joǵaryda institýt jáne qoǵam sarapshylary atalǵan máselelerdiń aspektilerin talqylaitynyn jetkizdi.
«Ulttyq keńes bizdiń elimizdegi demokratiiany, azamattardyń bostandyq indeksin joǵarylatýǵa óziniń úlesin qosyp otyr. Sarapshylar osylai deidi. Árine bizdiń qoǵamda Ulttyq keńeske qatysty ártúrli kózqaras bar. Bireýler bul keńestiń jumysyna syn kózben qaraidy. Pikir alýandyǵy bolǵandyqtan bul zańdy nárse. Biraq sarapshylardyń paiymdaýynsha, Ulttyq keńes - búgingi tańda elimizdiń ishinde halyqtyń ózin-ózi basqarýy, azamattardyń erkindigi men bostandyǵy turǵysynda jasalǵan úlken naqty qadam. Qasym-Jomart Toqaevtyń usynǵan saiasi reformalar paketi búgingi tańda halyq arasynda oń baǵaǵa ie bolyp otyr», - dedi ol.
