Almaty qalasynyń ákimi Baqytjan Saǵyntaev injenerlik jáne áleýmettik infraqurylymdar salynyp jatqan birqatar yqshamaýdandy aralady, sondai-aq aýmaqtardy abattandyrý jobalarymen tanysty.
Almaty ákimi Instagram-daǵy paraqshasynda jumys saparymen trolleibýs parkin jetildirý,júrgizýshilerdiń áleýmettik jaǵdaiy men LRT-ny damytý, sondai-aq Alataý aýdanyndaǵy «Alǵabas» yqshamaýdanynda injenerlik infraqurylym salý jobalarymen tanysqanyn habarlady.
Munda 13,5 shaqyrym sýmen jabdyqtaý jáne 17 shaqyrym sý burý jelileri salynady. Joldy tegisteý men jol tóseý jumystary júrgizilýde.
«Kólik jolairyǵynyń qurylys alańdarynda boldym. Rysqulov dańǵyly men Emtsov kóshesiniń qiylysyndaǵy qurylys jumysyn jyl sońyna deiin, Seifýllin dańǵyly men Jansúgirov kóshesindegi jumysty kelesi jyldyń birinshi jartyjyldyǵynda aiaqtaý josparda bar», - dep jazdy B. Saǵyntaev.
Onyń tapsyrmasy boiynsha energotiimdilik jáne infraqurylymdyq damý, qalalyq mobildilik basqarmalary infraqurylymdyq jeliler tartylǵan Tóle bi kóshesindegi ýchaskelerdi retke keltiretin bolady.
Almaty ákimi sonymen qatar Alataý aýdanynyń «Saialy» yqshamaýdanyndaǵy 1800 oryndyq mektep qurylysynyń barysymen tanysty. Osy jyldyń sońyna deiin paidalanýǵa beriledi dep josparlanýda. Túrksib aýdanynyń Ogarev kóshesiniń boiyna zamanaýi balabaqsha men oqýshylar úiin salý josparda.
B. Saǵyntaev áýejai skverin, Maiak toǵaiyn qalpyna keltirý jáne Boraldai ózeniniń jaǵalaýyn jaqsartý jobalaryn qarady. Munda Alataý aýdanynyń «Kók-Qainar» yqshamaýdanynyń turǵyndary úshin eresekterdiń demalýyna arnalǵan jańa qoǵamdyq keńistik jáne balalar men jasóspirimderge arnalǵan belsendi aimaqtar qurylady.
