Almaty ákimi Baqytjan Saǵyntaev balalardy qosymsha bilimmen tolyq qamtý sharalary týraly aitty, dep habarlaidy "Ult aqparat".
Memleket basshysynyń halyqqa Joldaýynda aitylǵan tapsyrmalaryna sáikes Almatyda qalanyń barlyq balalaryna qosymsha bilim berýdi qamtamasyz etý mindeti sheshilip jatyr.
«Qalada 17 qosymsha bilim berý uiymy jumys isteidi. Onyń ishinde Oqýshylar saraiy, 7 aýdandyq oqýshylar úii, óner mektebi, 8 mýzykalyq mektep bar, onda 1329 túrli úiirmeler men sektsiialar tegin jumys isteidi. Sondai-aq, Almaty qalasy ákiminiń tapsyrmasy boiynsha keler jyly Alataý jáne Naýryzbai aýdandarynda Oqýshylar sarailarynyń qurylysyn bastaý josparlanǵan. Alataý aýdanynda 5 sporttyq-saýyqtyrý kesheni, tennis ortalyǵy salynady. Jetisý aýdanynda shyǵys jekpe-jeginiń 4 sport kesheni salyndy, onda balalar tegin jattyǵýlar jasaidy. Sonymen qatar, memlekettik jekelik áriptestik aiasynda jeke investitsiialar esebinen 12 mekteptiń sport alańdary qaita jańǵyrtyldy. Mádeniet salasynda Ortalyqtandyrylǵan kitaphana júiesiniń 10 salalyq kitaphanasy jańardy. Balalardyń qosymsha bilim alýy úshin memlekettik tapsyrysty tek memlekettik uiymdarda ǵana emes, sonymen qatar jekemenshik mektepter de alatyn bolady», - dedi B. Saǵyntaev Akimat Live baǵdarlamasynyń tikelei efirinde.
Qala turǵyndarynyń suraqtaryna jaýap bere otyryp, qala ákimi Jetisý aýdany Ainabulaq-2 eldi mekenindegi «Shyńǵa Órleý» áleýmettik klýbynyń jobasy týraly aitty. Bul jobanyń aýqymy keńeitilip, basqa aýdandarda osyndai taǵy úsh klýb ashylatyn bolady.
«Osy usynyspen Úkimetke shyǵatyn bolamyz. Basqa da jobalar oida bar. Mysaly burynǵy pedagog mamandar, zeinetkerler balalardy qosymsha oqytatyn bolady. Jetisý aýdanynda ashylǵan dombyra synyby jetkiliksiz. Osy siiaqty bastamany basqa aýdan ákimderine de tapsyrdym. Konservatoriia túlekterin shaqyryp, kásipkerlerdi tartyp, damytýǵa yntaly bolý kerek. Oqytýshy bop kelgen jas mamandarǵa jaǵdai jasaý kerek. Tek dombyra ǵana emes, sport alańdary taǵy basqa jobalar kerek. Balalardy bos jiberip koimasaq, jasóspirimder arasynda zańbuzýshylyq tómen bolady», - dedi ákim.
