Onlain formatta ótken aimaqtyq úilestirý keńesiniń otyrysynda Almaty qalasynyń ákimi Baqytjan Saǵyntaev kásipkerlermen karantin talaptaryn saqtaý jáne shaǵyn jáne orta biznesti qoldaý kórsetý máselelerin talqylady, dep habarlaidy "Ult aqparat".
Baqytjan Saǵyntaev mýtatsiiaǵa ushyraǵan virýs shtamynyń tarap, jaǵdaidyń ýshyǵýyna bailanysty Almatydaǵy epidemiologiialyq jaǵdaidyń kúrdelengenin atap ótti.
Onyń aitýynsha, taralý jyldamdyǵy boiynsha qazirgi jaǵdai ótken jazǵa qaraǵanda áldeqaida kúrdeli.
Epidemiia bastalǵaly beri qaýipti virýsty 32 597 adam juqtyrǵan (halyqtyń 100 myńyna shaqqandaǵy kórsetkish 1602,0 quraidy). 1 qańtar men 27 naýryz aralyǵynda 14 856 adam.
2020 jyly KVI-di juqtyrǵan 18521 naýqas tirkelgen. 27 naýryzda bir kúnniń ishinde koronavirýs infektsiiasyn juqtyrǵan 510 naýqas tirkeldi (jergilikti), sonyń ishinde 415 naýqasta simptomdy bolsa, 95-i simptomsyz.
Osy rette B. Saǵyntaev barsha turǵyndarǵa karantin talaptaryn qatań saqtaýǵa, betperde kiip, áleýmettik araqashyqtyqty saqtaýǵa jáne kópshilik sharalardy ótkizýden bas tartyp, adam kóp shoǵyrlanǵan jerge barmaýǵa shaqyrdy.
Kezdesýde kásipkerler salyqty, jaldaý aqysyn men basqa da mindetti tólemderdi keiinge qaldyrý, sondai-aq qarjylyq qoldaý siiaqty sharalardy usyný týraly suraqtar qoidy. Bul máseleni ákimdik úkimetpen birge talqylaidy.
Qala ákiminiń tapsyrmasy boiynsha jazǵy alańdar men «Ashyq» jobasyna kiretin kompaniialardyń jumysyn qalpyna keltirý múmkindigi qarastyrylady.
Sonymen qatar, biznes qaýymdastyq «Ashyq» jobasynyń fýnktsionaldyǵyn keńeitý jáne vaktsinalanǵan turǵyndarǵa densaýlyq pasportyn engizý týraly pikirler aitty. Sondai-aq, aimaqtyq úilestirý keńesiniń músheleri aldaǵy jappai vaktsinatsiia naýqanyn qoldaýǵa daiyn ekendikterin bildirdi.
