Kásipqoi boksshy Sadriddin Ahmedov WBC nusqasy boiynsha álem chempiony atanǵannan keiingi óz áserimen bólisti, dep habarlaidy "Ult aqparat".
«Assalamýaǵaleikým Qazaq eli! Búgin Allanyń qalaýymen, óz halqymnyń qoldaýymen əlemdik bokstaǵy WBC nusqasy boiynsha əlem chempiony ataǵyna qol jetkizdik. Sizderdiń maǵan degen duǵalaryńyzǵa, qoldaýlaryńyzǵa alǵysym sheksiz. Eń birinshi elimiz tynysh, halqymyz aman bolsyn. 2018 jyl qazaq eline óte aýyr jyldardyń biri boldy. Qoǵam qairatkeri, jazýshy Sherhan Murtaza atamyzdyń, qazaqtyń mańdaiynda bitken jarqyraǵan juldyzy, patrioty Denis baýyrymyzdyń ómirden ótýi elimiz úshin aýyr soqqy bolsa, Gennadii aǵamyzdyń biz kútpegen jerden jeńilýi qanshama qazaq jankúierlerin jylatty», - dep jazdy S.Ahmedov óziniń Feisbýk paraqshasyna.
Sportshy ómirden ozǵan aitýly tulǵalardyń ornyn esh amal toltyra almaitynyn aita kele, bokstaǵy kezekti jeńisin solardyń qurmetine arnady.
«Bul jeńisimizdi sol kisilerdiń ómirden ozýy, Gennadii aǵamyzdyń jeńilýi jəne elimizde ózge de oryn alǵan qaiǵyly oqiǵadan sońǵy qazaq halqynyń kóz jasyna arnaimyn. Elimizdiń bolashaǵyna alańdaityn qazaq jastarymyz, aǵalarymyz barda, ol kisilerdiń elimizge arnaǵan eńbegi zaia ketpedi dep aita alamyn», - dedi ol.
Sonymen qatar, boksshy ústimizdegi jyldyń jastar jyly bolyp bekitilgenin aita kele, óz zamandastaryna úlken jaýapkershilik júktelgenin eskerip, jastardy bilim alý men elimizdiń damýyna úles qosýǵa shaqyrdy.
Aita ketsek, otandasymyz búgin Kanadanyń Monreal qalasynda ótken bosktaǵy kezekshi jekpe-jeginde Meksika boksshysy Abraham Hýaresti (13-2, 5 KO) 4 raýndta ýaqytynan buryn jeńip, WBC nusqasy boiynsha jastar arasynda birinshi orta salmaqta álem chempiony atandy.
