Almaty Arena sport kesheninde ótken boks keshinde otandasymyz Sadriddin Ahmedov WBC Asia chempiony atandy, dep habarlaidy QazAqparat tilshisi.
10 raýndtyq kezdesýde Sadriddinge indoneziialyq Djon Rýbo qarsy shyqqan bolatyn. Ol sharshy alańda 23 jekpe-jek ótkizip, 17-sinde jeńiske jetip, 9-yn merziminen buryn aiaqtaǵan, 5 ret jeńilistiń ashy dámin tatqan myqty boksshylardyń biri sanalady.
Alǵashqy raýnd boksshylardyń ańdysýymen ótti desek te bolady. Alaida, raýnd ortasyna taman Sadriddin birneshe djeb jasap, qarsylasy basyn qorǵana bastaǵan sátinde eki búireginen, baýyrynan alma-kezek tómpeshtep aldy. Ekinshi raýndta da qazaq boksshysy sol qolymen djeb jasai otyryp, qarsylasynyń qorǵanysqa kóshken mezetinde eki búiirinen, qulaq-shekesinen aýyr soqqylar jumsaýǵa tyrysyp baqty. Sadriddin úshinshi raýndta da indoneziialyqtyń shabýyl jasaýyna esh múmkindik bermedi. Baýyrynan, búiirinen soqqylap, qarsylasy qarsy umtylǵan kezde birneshe márte apperkot jasap úlgerip jatty.
Tórtinshi raýndta Sadriddin urys mánerin sál ózgertip, qarsylasyn tek sol qolymen qulaq-shekeden, ishten uryp, apperkot jasaýǵa tyrysty. Djon da alǵa umtylyp, soqqylaryn darytqysy keldi. Kelesi raýndta indoneziialyq qolyn ońdy-soldy sermep, alǵa umtylǵanymen Sadriddinniń kútip alyp, urǵan soqqylary oǵan dál tie berdi. Altynsha raýndta Rýbo ońai shaǵylatyn «jańǵaq» emestigin tanytty. Sadriddinniń birneshe aýyr soqqylaryna tótep berdi. Jetinshi raýndta qarsylasynyń soqqylaryna qaramastan alǵa entelegen Rýbo tózimdi ekenin kórsetti. Al Qazaqstan boksshysy qorǵana júrip, oń, sol qolymen qarsylasynyń baýyrynan aýyr soqqy jumsap úlgerdi. Qalǵan raýndtarda da Sadriddinniń aýyr soqqylary dál tigenimen, Rýbo laiyqty qarsylyq tanyta bildi. Sonymen, 10 raýndtyń qorytyndysynda upai sanymen Qazaqstan boksshysy jeńiske jetip, WBC Asia titýlyn jeńip aldy.
«Qazaq eli úshin» degen soń bul kezdesýge kelisim berdik. 10 raýnd ótkizeiik dep kelisken edik. Sondyqtan sizderge nokaýt kórsete almaǵanym úshin keshirim suraimyn. Endi qazaq eliniń kóńilin túsirgen Kaneloǵa qarsy daiyndalyp jatyrmyz. Gennadii aǵamyzdyń Kaneloǵa ketken esesin qaitaramyz», - dedi jekpe-jekten keiin sóz alǵan Sadriddin Ahmetov.
Eske sala keteiik, 26 qańtarda Kanadanyń Monreal qalasynda ótken aldyńǵy jekpe-jeginde Sadriddin meksikalyq Abraham Hýaresti (13-2, 5KO) tórtinshi raýndta nokaýtqa jiberip, birinshi orta salmaqta jastar arasyndaǵy WBC tujyrymy boiynsha álem chempiony atanǵan bolatyn.
