Respýblikalyq biýdjetke iri kásipkerlik sýbektilerinen ǵana korporativtik tabys salyǵynyń túsimderi baǵyttalady. Bul týraly Parlament Senatynyń jalpy otyrysynda Ulttyq ekonomika ministri Rýslan Dálenov málim etti, dep habarlaidy "Ult aqparat".
Atap aiqanda, bul qadamdar jalpy otyrysta eki oqylymda qaralyp, qabyldanǵan «Qazaqstan Respýblikasynyń keibir zańnamalyq aktilerine QR ákimshilik-aýmaqtyq qurylysy, memlekettik basqarý júiesin, biýdjetaralyq qatynastardy jetildirý, kreditteý jáne bilim berý máseleleri boiynsha ózgerister men tolyqtyrýlar engizý týraly» Zańynda qamtylyp otyr.
Zań jobasy Jer, Biýdjet, Qylmystyq-protsestik, Azamattyq protsestik kodeksterine, «Salyq jáne biýdjetke tólenetin basqa da mindetti tólemder týraly» kodekske jáne 25 zańǵa túzetýler engizýdi kózdeidi.
«Zań jobasynda keibir kúsh qurylymdaryn qaita uiymdastyrý bóliginde ózgerister engizý josparlanǵan. Osylaisha, Qazaqstan Respýblikasy Memlekettik kúzet qyzmetiniń qaita uiymdastyrylýyna, sondai-aq Qazaqstan Respýblikasy Ulttyq qaýipsizdik komitetine Qazaqstan Respýblikasy «Syrbar» Syrtqy barlaý qyzmetiniń qosylýyna bailanysty zańnamalyq aktilerge ózgerister engizý kózdelip otyr», - dedi R. Dálenov.
Onyń sózine qaraǵanda, 2020 jyldan bastap jergilikti biýdjetterge shaǵyn jáne orta biznesten túsetin korporativtik tabys salyǵyn berý usynylýda.
«Respýblikalyq biýdjetke iri kásipkerlik sýbektilerinen ǵana korporativtik tabys salyǵynyń túsimderi túsetin bolady.
Jergilikti biýdjetterge korporativtik tabys salyǵyn berý óńirler ekonomikasynyń, shaǵyn jáne orta biznestiń damýyn yntalandyratyn bolady jáne jergilikti biýdjetterdiń tabystaryn ulǵaitady», - dep naqtylady vedomstvo basshysy.
Sonymen qatar, Jalpyulttyq is-sharalar josparynyń 73-tarmaǵy aiasynda respýblikalyq mańyzy bar qalalar men elordanyń, onyń ishinde qala qurylysy saiasaty, kólik infraqurylymy, sáýlettik kelbetti qalyptastyrý salalarynda quzyretterdi keńeitý kózdelip otyr. Bul túzetýler respýblikalyq mańyzy bar qalalar men elordany damytýdyń ózekti máselelerin sheshýge múmkindik beredi.
«Budan bólek, «Qazaqstan Respýblikasynyń memlekettik qyzmeti týraly» zańǵa ózgeris engizý kózdelip otyr, oǵan sáikes jastar kadrlyq rezervine alynǵan azamattar memlekettik ákimshilik laýazymdarǵa konkýrstan tys tártibinde ornalasa alady», - dedi R. Dálenov.
Aita keteiik, qujat aiasynda bilim berý mekemelerin basqarý jáne biýdjetin ákimshilendirý fýnktsiialary aýdandyq deńgeiden oblystyq deńgeige beriletin bolady.
«Joǵaryda aitylǵan túzetýler zańnamanyń keibir normalaryn sáikestendirýge, biýdjetaralyq qatynastar men memlekettik basqarý júiesin jetildirýge baǵyttalǵan», - dedi Ulttyq ekonomika ministr.
