Rýmyniiadaǵy basylym Qazaqstannyń Biologiialyq qaýipsizdik problemalary ǵylymi-zertteý institýtynyń QazVac vaktsinasy týraly jazdy. Dúniejúzilik densaýlyq saqtaý uiymy 2020 jyldyń 15 mamyrynda bul ekpeni kandidat vaktsina retinde tirkeldi, dep habarlaidy QazAqparat.
Byltyrǵy jyldyń qyrkúiek aiynda ótkizilgen 1-shi fazanyń klinikalyq synaǵyna 44 erikti qatysty, al 17 qazanda 200 eriktiniń qatysýymen 2-shi fazanyń synaǵy bastalǵan.
Qazaqstanda koronavirýsqa shaldyǵýdyń birinshi oqiǵasy 2020 jyldyń naýryzynda rastaldy. 23 naýryzda infektsiia juqtyrǵan patsientterden úlgiler alynyp, olardyń biologiialyq qasietteri zerttelip, COVID-19 retinde anyqtalǵan virýs bólindi, delingen Qazaqstan Respýblikasy Densaýlyq saqtaý ministrliginiń málimdemesinde.
Qazaqstannyń Biologiialyq qaýipsizdik problemalary ǵylymi-zertteý institýtynyń mamandary QazVac nemese QazCovid-In vaktsinasyn tanymal tehnologiialyq platforma dep sipattady.
«Bul – inaktivtelgen, iaǵni himiialyq ádisterdiń kómegimen óltirilgen, odan keiin hromotografiialyq ádister arqyly kúrdeli baǵalaýǵa ushyraǵan koronavirýs infektsiiasy qozdyrýshysynyń biologiialyq massasyn shyǵaratyn klassikalyq tehnologiialyq protsedýra».
Almaty jáne Taraz qalalarynda erik bildirgen 3000 adamǵa QazVac vaktsinasy egildi.
QazVac vaktsinasyn óndirý jumystaryna qatysqan mamandardyń biri Lespek Qutymbetovtiń atýynsha, vaktsinany Tselsii boiynsha 2-8 gradýs temperatýrada kádimgi úide turǵan tońazytqyshta saqtaýǵa bolady.
«Bul vaktsinany bizdiń institýt shyǵarǵan. Qorapta 10 dozany quraityn 10 quty bar. Iaǵni ár qutyda bir dozadan. Qutyǵa jarty millilitr nemese 10 tamshy vaktsina quiylǵan. Qoldaný aldynda qutyny jaqsylap shaiqaý kerek. Bul quty 21 kúnnen keiin ekinshi komponentti salý úshin qoldanylady. Vaktsina 2-8 gradýs aralyǵyndaǵy temperatýrada, kádimgi úidegi tońazytqyshta saqtalady. Ony muzdatý qajet emes, bir jyl saqtaýǵa bolady», - dedi Qutymbetov.
19 jeltoqsanda Qazaqstannyń Densaýlyq saqtaý ministrligi klinikalyq synaqtardyń 3-shi fazasyn ótkizýge ruqsatyn berdi. Almaty jáne Taraz qalalarynda erik bildirgen 3000 adamǵa QazCovid-in vaktsinasy egildi. Ekpeniń qandai da bir janama áseri nemese oǵan shaǵym tirkelgen joq.
Qazaqstanda shyǵarylǵan QazVac vaktsinasy – ekidozalyq vaktsina, onyń bir qutysy bir adamǵa eseptelgen. Budan basqa, otandyq vaktsina muzdatýdy qajet etpeidi, ol pliýs 2-8 gradýs aralyǵyndaǵy temperatýrada saqtala beredi, dep atap ótti basylym.
QazCovid-In (QazVac) vaktsinasyn klinikalyq synaýdyń úshinshi fazasy 9 shildege qarai aiaqtalady. Qazaqstandyq sarapshylardyń aitýynsha, bul zertteýge 3000 adamnan kem bolmaǵan eriktiler qatysyp otyr.
«Klinikalyq synaýdyń úshinshi fazasynyń naqty aiaqtalatyn kúni – 2021 jyldyń 9 shildesi. Budan keiin 3000 eriktiniń málimetterin óńdeý boiynsha úlken jumys júrgiziledi, oǵan shamamen 20 kúntizbelik kún ketedi. Budan keiin bizdiń esebimiz Densaýlyq saqtaý ministrligine usynylady», - dedi ǴZI basshysy Kúnsulý Zakariia.
Qazaqstan vaktsina óndirisin iske qosqan álem elderiniń «ondyǵyna» jáne vaktsina óndirisiniń tolyq tsiklyn ózdiginen igerip alǵan elderdiń «bestigine» kirip otyr.
2021 jyly 22 cáýir kúni COVID-19-ǵa qarsy qazaqstandyq QazVac (QazCovid-in) vaktsinasynyń alǵashqy partiiasy jóneltildi.
26 sáýirde Densaýlyq saqtaý ministri Aleksei Tsoi alǵashqylardyń biri bolyp KVI-ge otandyq QazVac vaktsinasymen ekpe aldy.
