Mádeniet jáne sport ministri Aqtoty Raiymqulova «Karantindegi juldyz» jobasy jalǵasatynyn málim etti, dep habarlaidy QazAqparat.
«Mádeniet jáne sport ministrligi elde tótenshe jaǵdai jariialanǵaly beri óner men sporttyń barshaǵa qoljetimdiligin qamtamasyz etý maqsatynda onlain nusqadaǵy jumys tártibine kóshti. Barlyq respýblikalyq óner oshaǵy kestege sáikes kún saiyn qoiylymdaryn onlain-rejimde óz saittarynda, You Tube arnalary men áleýmettik jelilerde jariialap keledi. Jalpy respýblika boiynsha mádeniet jáne sport mekemeleriniń 90 paiyzyna jýyǵy qashyqtan jumys rejimine aýystyryldy. Kún saiyn tańǵy 08-00-den bastap keshki 09-00-ge deiin mádeniet jáne sport salasynyń ókilderi qazaqstandyqtarǵa úiden shyqpai, boi jazý jattyǵýlaryn jasap, túrli kezdesýler, lektsiialar, kontsertter ótkizip keledi», - dedi ministr OKQ-da ótken baspasóz máslihatynda.
Aqtoty Raiymqulovanyń aitýynsha, keshki ýaqytta mádeniet maitalmandary kórermenderge ásem ánderi men áýezdi kúilerin arnaýda.
«Jalpy ministrliktiń bastamasymen qolǵa alynǵan jańa formattaǵy jumys tártibi búgin de jalǵasyp, qazir jergilikti ónerpazdardyń qatysýymen onlain kezdesýler men lektsiialar, kontsertter ótip jatyr. Sońǵy 10 kúnde 600-ge jýyq onlain-shara ótkizildi. Bul rette bastalǵanyna kóp bolmasa da kórermenniń ystyq yqylasyna bólengen «Karantindegi juldyz» jobasy týraly aitqym keledi. 23 naýryzda alǵashqy efiri shyqqaly beri «Qazaqtelekom» birlesip, ótkizip kele jatqan kontsertter LIVE formatynda uiymdastyrylyp keledi. Kesh barysynda qazaqstandyqtar áleýmettik jeliler arqyly óner juldyzdarymen tikelei suhbattasýda. Osy joba bastalǵaly beri Jubanysh Jeksenuly, Sáken Maiǵaziev, Jeńis Seidýllauly, Medeý Arynbaev, Ǵadilbek Janai, Nurjan Kermenbaev, Roza Rymbaeva siiaqty juldyzdarymyz ónerin halyqqa arnady»- ded ol.
Aqtoty Raiymqulova bul rette Roza Qýanyshqyzynyń ónerin Memleket basshysy joǵary baǵalaǵanyn eske saldy.
«Bul bizge úlken abyroi júkteitin zor jaýapkershilik. Ańdatpa retinde aita ketsek, kórermenniń suraýy boiynsha Qazaqstannyń Halyq ártisi búgin de ekinshi onlain kontsertin usynady», - dedi ministr.
