Osy jyly Roza Baǵlanovanyń ómiri jaily tarihi drama teleefirde shyǵady, dep habarlaidy QazAqparat.
QR Aqparat jáne qoǵamdyq damý ministrliginiń qoldaýymen 18-19 jeltoqsan 12:30-da «Habar» telearnasy KSRO Halyq ártisi Roza Baǵlanovanyń ómirine arnalǵan tarihi «Bulbul» telehikaiasynyń tusaýkeserin usynbaq.
Jaqynda Almatyda aty ańyzǵa ainalǵan ánshiniń týystary men dostarynyń qatysýymen jabyq kórsetilim ótti. 2022 jyldyń 1 qańtarynda týǵanyna 100 jyl tolady.
«Bulbul» telehikaiasy – uly tulǵanyń ómirinen syr shertetin zamanaýi baiopik kanondaryna quralǵan biografiialyq kartina. Roza Baǵlanova ómiriniń negizgi tustaryn ashatyn tarihi bólimi de bar. Shyǵarmashylyqtan tys ómiri de kórsetilgen. Roza Tájibaiqyzynyń issaparlary men ánshiliginen bólek belsendi azamattyq ustanymy da bar bolatyn. Aral teńizi men Semei poligony máseleleri jaily jii aitatyn.
- Bul kúnder óte aýyr, biraq óte qyzyqty ótken edi. Karantinǵa bailanysty túsirilimdi keiinge shegerip júrdik. Biraq eshteńege qaramastan serialdy Tashkentte de, Minskide de, Almatyda da túsirdik. Dekoratsiia, sahnalyq kostiýmder tańdaý jáne bezendirý boiynsha kóp jumys jasaldy. Tipti bazar aralap, ájelerden satyp alyp ta júrdik, - dedi bas prodiýser Gúlnur Mamasaripova.
Joba rejissery: Sanjar Omarov
Operator: Karshyǵa Ospanov
Basty rólderde: Zarina Jákenova jáne Darhan Súleimenov
